由高畑勳執導、吉卜力工作室於1988年推出嘅動畫《再見螢火蟲》講述了少年兄妹清太與節子與戰爭中求生嘅絕望故事，被譽為有史以來最偉大戰爭、反戰電影之一，亦係唔少人（包括我）細個睇完喊到有陰影嘅動畫電影。不過近日日本網絡就牽起一陣「認真討論」，指身為海軍上尉子女嘅清太及節子，根本冇可能於戰爭過得如此淒慘，更加唔可能最後絕望收場。甚至有網民翻出，早於1996年宮崎駿就曾經「官方吐糟」過呢個設定。

由於《再見螢火蟲》太過經典，所以日本網絡久唔久就會有相關劇情討論。例如一直有人認為只要哥哥清太肯好好地搵返份工，兩兄妹至少唔會落得餓死街頭嘅下場。而近日有網民就再延伸討論，表示清太節子老豆乃係日本海軍上尉，即便最後於戰爭中陣亡，亦一定會留下一大筆撫卹金，況且以當時嘅日本社會風氣，無論係為面子定為義氣，軍方或爸爸嘅同僚都一定會設法搵到清太（重男輕女嘛）好好照顧。簡單黎講，就即係兄妹二人要非常唔好彩（例如軍方搵唔到佢哋，撫恤金又被阿姨吞咗之類），先會如電影一樣雙雙隕命。

值得一提嘅係，網民提到將自身經歷改篇成《再見螢火蟲》原著小說嘅作者野坂昭如（筆名：阿木由紀夫）曾表示，當年佢就係搵返負責管理家族財產嘅銀行員，並靠倖存嘅印章及存摺拎到戶口入面嘅錢，最終渡過難關。

來源：https://twitter.com/castle_gtm/status/984788263054405633

有趣嘅係，有網民翻出於1996年出版嘅《風之谷》解讀本《娜烏西卡解讀：烏托邦的臨界》，發現宮崎駿喺二十年前就曾經「吐糟」過清太節子嘅「軍官子女」設定。當時宮崎駿指出：「巡洋艦長嘅兒子絕不可能餓死…就如同野坂昭如自己冇餓死一樣，清太及節子都唔可能餓死。靠著海軍士官之間嘅情誼，一定有幫助佢哋嘅方法。況且巡洋艦長係軍中精英，一聽到神戶被空襲，當地士官一定會出手，派遣手下去搵兩個孩子先係。」