據多間外媒報導，曾執導《美國隊長2＆3》、《復仇者聯盟3＆4》嘅羅素兄弟（Russo brothers）有望重返MCU，執導接住落嚟嘅《復仇者聯盟》兩部續集！若然消息屬實，大家會唔會對MCU有返啲信心呢？

羅素兄弟自2014年憑《美國隊長2：酷寒戰士》打響名堂後，其後又執導了《美國隊長3：英雄內戰》、《復仇者聯盟3：無限之戰》、《復仇者聯盟4：終局之戰》等叫好又叫座嘅作品，4部電影合共為Marvel Studios帶嚟超過66.81億美元票房收入，其中《終局之戰》更以27.9億美元驚人票房位居影史第二名。離開MCU後，近年羅素兄弟就轉戰串流平台搞搞新意思，分別與Netflix合作《驚天營救（Extraction）》與《灰影人（The Gray Man）》，並監製過奧斯卡金像獎最佳電影《奇異女俠玩救宇宙（Everything Everywhere All at Once）》。

隨住MCU近年人氣每況愈下，評價及票房都大不如前，一直有聲音希望呢對曾帶領MCU走向巔峰嘅導演檔能回歸救場。最近就有消息指，Marvel Studios正為《復仇者聯盟》兩部續集物色導演，除咗先前所傳嘅《死侍與狼人（Deadpool & Wolverine）》導演 Shawn Levy，羅素兄弟亦係潛在人選。雖然洽談目前仍然處於早期階段，但消息曝光後已經令Fans們無比興奮，樂見呢對「真．Marvel救世主」能夠回歸，協助MCU力挽狂瀾再創輝煌。