奧斯卡影帝Joaquin Phoenix因為在新戲開拍前5日突然辭演，讓製作團隊恐面臨數百萬美元損失，引起荷里活影壇廣泛關注，其中就有知情人士爆料，表示Joaquin Phoenix都唔係第一次臨陣退縮，當年拍攝《拿破崙》期間亦試過要脅劇組退出製作。

據外媒《THR》報導，Joaquin Phoenix原定將會出演一部由Todd Haynes執導、以1930年代為背景嘅限制級同志電影，然而當一切準備就緒，Joaquin Phoenix卻在開拍前5日突然宣布劈炮唔撈，讓製作團隊陷入困境，恐損失數百萬美元前期製作費用。消息傳出後，唔少業界人士都感到非常不滿，紛紛呼籲製作團隊採取法律行動追討，甚至有製作人正考慮封殺Joaquin Phoenix。

對於Joaquin Phoenix臨陣退縮一事，有知情人士就爆料佢曾經在拍攝《拿破崙》期間，要脅戲組搵嚟同佢合作過嘅Paul Thomas Anderson重寫劇本，否則還出製作，但經過一輪安撫後，最後決定留低繼續拍攝。目前Joaquin Phoenix仍未交代辭演原因，但佢曾經喺電視節目《60 Minutes》透露過，每次接演角色時都會感到好驚恐，並在開拍前特別緊張，因為擔心自己無法搵到合適嘅演出方式詮釋角色。而最弔詭嘅係，當初係Joaquin Phoenix拎住劇本主動搵Todd Haynes開呢套戲，而佢又同時擔任聯合編劇，點解突然唔撈真係不得而知。

事實上，荷里活過去亦發生過同類事件，例如Kim Basinger曾於1993年因違反口頭承諾拒拍《Boxing Helena》而被告上法庭，最終被判須支付380萬美元賠償金。而Bruce Willis亦試過拍攝迪士尼電影《Broadway Brawler》期間中途退出，搞到後來要以低於市價片酬為迪士尼拍攝另外3部電影「謝罪」，其中兩部分別係《Armageddon（絕世天劫）》同《The Sixth Sense（鬼眼）》。不過，有業內人士就認為今次事件並唔會對Joaquin Phoenix職業生涯造成太大影響，事關佢套新作《小丑：雙瘋》將於10月正式上映，預計Joaquin Phoenix將會獲得豐厚票房分紅，到時會拎部分收益賠償劇組達成和解。