近日因演員Alec Baldwin「過失殺人」案結幕，加上李小龍兒子李國豪遺作《The Crow》被翻拍，令拍攝時是否應使用真槍再次成為荷里活嘅話題之一。而非常鍾意槍戰場面嘅著名導演Quentin Tarantino（昆頓塔倫天奴）早前接受訪問時，就堅拒使用假槍拍攝，仲利用成人片中嘅「勃起」黎比喻。

圖片：IMDB

卻說Quentin Tarantino早前登上美國Talk Show主持人Bill Maher嘅Podcast節目，席間兩人就談到Alec Baldwin嘅案件。Quentin Tarantino先係表示「公道黎講」，當日負責處理槍械嘅工作人員要負上90%責任，但Alec Baldwin亦要負上最後10%，「嗰支槍黎㗎，件事某程度上都係有佢份。」

隨後Bill Maher又問道：「點解拍攝時唔可以全部都用假槍呢？」對此Quentin Tarantino回答：「我夠可以喺成人片入面用CG勃起陽具，但邊X到有人想睇呢啲啫？發射空包彈然後見到有橙色嘅火光——真火光，唔係假嘅——係一件令人興奮嘅事黎！」佢進一步指出：「咁多年黎拍過咁多部有用槍嘅電影，到目前為止只係出過兩次意外（正正就係Alec Baldwin事件及李國豪事件），我覺得係個好X勁嘅紀錄黎架啦！」

圖片：《Pulp Fiction》

Quentin Tarantino嘅發言明顯地係會引起某部份人嘅不滿，例如《Screenrant》就表示：「用實彈拍攝增加刺激感並非一個合理嘅取捨」、「演員應該能夠令人信服地呈現場面當中嘅情緒，而不需要依賴真槍，而導演亦應該能夠於唔需要真槍嘅情況下調度場面」。佢哋亦提出唔少電影需要適應比起「開槍」更需要想像力及困難嘅情況，如果呢啲戲都拍得出黎，咁業界無理由唔可以捨棄真槍拍攝。

資料來源：Variety、Screenrant