曾榮獲13次格林美獎，身兼歌手、監製、作曲家、Louis Vuitton創意總監嘅Pharrell Williams今次跨界聯乘LEGO，推出型爆黑金色穿梭機積木套裝，各位收藏家請勿錯過。

隨住Pharrell Williams個人傳記LEGO電影《Piece by Piece》將於10月上映，LEGO團隊與Pharrell Williams聯手設計出積木套裝「Over the Moon with Pharrell Williams」，以966塊磚拼砌出全黑流線型機身太空穿梭機，並配以閃耀奪目嘅金色座艙罩，乘著五彩繽紛噴射流飛奔到月球。另外，模型亦附上一個可以收納49個LEGO人仔頭部嘅算盤展示架，其中30多個係特別為呢款套裝設計，讓任何人都可以搵到代表自己嘅人仔。

至於點解會選擇穿梭機，Pharrell就表示自己兒時住在Atlantis Apartments，對現實嘅認知只局限於住所20哩範圍內，而附近有一個空軍基地，美國海軍藍天使特技飛行隊經常進行演練，抬頭仰望天空成日會見到噴射機。與此同時，當年亦係人類著迷於太空嘅年代，令佢覺得如果想去到更遠嘅地方，就必須乘搭太空穿梭機，所以決定以穿梭機呈現出個人故事。

「LEGO 10391 Over the Moon with Pharrell Williams」預計在2024年9月20日正式發售，建議售價為109.99美金（約HK$857）。