經典處境喜劇《Friends》係唔少人心中嘅神作，甚至間唔時就會翻睇，但好可惜，劇集將於10月31日從Netflix下架，或者同HBO串流平台Max即將登陸香港有關。

由1994年開播至2004年結束嘅《Friends》全劇共10季、多達236集，憑溫情又幽默嘅情節，加上搞笑抵死對白深受觀眾歡迎，即完播完20年，至今仍然會有唔少Fans拎出嚟翻睇。然而最近就有網友發現，《Friends》即將在10月31日從香港區Netflix下架，日後大家想再重溫，可能就要幫襯另一個串流平台。

原因無他，因為華納旗下串流平台Max(前稱HBO Max)即將在年底登陸香港及台灣，而《Friends》版權本來就隸屬於華納集團，自不然會收回呢套皇牌劇集獨家播放，情況就類似當年迪士尼將《夜魔俠（Daredevil）》、《制裁者（The Punisher）》等劇集從Netflix收回到Disney+。