數年前，國際名導Christopher Nolan因為不滿華納兄弟戲院/串流平台同步上映政策，決定轉投環球影業開拍《Oppenheimer》，結束雙方長達20年合作關係。最近有消息指，即使華納兄弟開出七位數美元支票極力遊說，Nolan依然沒有回心轉意，繼續選擇與環球影業合作新片。

Christopher Nolan自2002年《Insomnia（白夜追兇）》與華納兄弟結緣，雙方在二十年期間共拍出9部電影，當中包括「The Dark Knight Trilogy（蝙蝠俠三部曲）」、《Inception（潛行凶間）》、《Interstellar（星際啟示錄）》等令人不禁翻睇又翻睇嘅經典作品。

然而在2020年，耗資2億美元嘅《TENET》因疫情陷入上映危機，當時Christopher Nolan為咗令電影能在大銀幕上映，決定放棄部份酬勞，堅守到戲院重開。雖然《TENET》最後成功在大銀幕上映，但票房卻不如預期，全球僅收3.659億美元。

或者係眼見Christopher Nolan呢啲票房保證都無法救市，時任華納媒體行政總裁Jason Kilar於同年12月宣布，將2021年發行嘅所有電影改由戲院與串流平台HBO Max（現稱Max）同步上架。此舉令身為「戲院體驗派」嘅Christopher Nolan非常不滿，甚更公開指責華納糟蹋電影，最後決定離開華納，轉投新東主環球影業懷抱，製作全新力作《Oppenheimer》，並一舉奪得奧斯卡7項大獎。

隨住華納媒體於2022年與Discovery合併成華納兄弟探索（Warner Bros. Discovery），高層大執位，消息指華納新高層曾聯繫Christopher Nolan，期望對方能夠回歸，並開出一張7位數美元支票，以彌補Nolan當年在《TENET》放棄嘅酬勞，不過仍然未能令Nolan回心轉意。對此，外媒《Variety》就引述查普曼大學電影與媒體藝術學院院長Stephen Galloway表示：「對Nolan嚟講，最重要係電影如何發行、行銷策略是否正確、有冇足夠嘅Imax影廳上映，以及能否讓他自由創作。拍攝《Oppenheimer》期間，環球影業全部都畀到佢，佢有咩理由唔選擇環球呢？」

Matt Damon於《Oppenheimer》扮演Leslie Groves將軍。

根據最新消息，Christopher Nolan下部作品將再次與環球影業合作，預計2026年7月17日以Imax格式上映，目前劇情細節仍然保密，但有消息指Matt Damon正洽談擔任主角。