哈利波特外傳電影系列《怪獸與牠們的產地（Fantastic Beasts）》，自2022年《怪獸與鄧不利多的秘密》上映後就再冇消息，唔少影迷都好奇呢個系列會否再有新作。最近男主角Eddie Redmayne接受訪問時就坦言：「我認為觀眾已經見到Newt嘅最後一面。」意味該系列可能就此完結。

Eddie Redmayne最近為宣傳新作《The Day of The Jackal》接受《Comicbook》訪問，當主持人問到觀眾是否已經見到Newt Scamander最後一面時，Eddie Redmayne表示：「我諗應該係喇，呢個係最直接嘅答案。當然，實情你要問下華納兄弟同J.K.羅琳，但據我所知道嘅情況，呢個系列已經結束。」與此同時，佢亦不忘調侃，表示Fans可以去佛羅里達環球影城，嗰度有哈利波特園區，或者可以一睹Newt風采。

除此之外，在電影中扮演年輕版鄧不利多嘅Jude Law日前接受《Variety》訪問亦表示：「據我所知，《怪獸》系列確實已經擱置。我估係因為華納兄弟正忙於製作劇集版《哈利波特》，所以將資源投放晒喺嗰度。到目前為止我都冇聽過《怪獸》系列任何新進展。」

在2016年上映嘅《怪獸與牠們的產地》，成功以1.8億美元成本斬獲8.14億票房，深受哈迷歡迎。但後來推出嘅《怪獸與葛林戴華德之罪》及《怪獸與鄧不利多的秘密》票房表現卻未如預期，分別只有6.54億及4.07億美元，所以如今宣布完結亦不令人感到意外。