由芥見下下原作，曾一度深受Fans喜愛、到「2.5条悟」後深受大眾嫌惡嘅《咒術迴戰》，日前於《Jump Festa 2025》上宣佈明年將推出新劇場版電影《懐玉・玉折》。不過比起劇場版本身，更矚目嘅或者係芥見下下於發佈會上表示自己正準備緊新作，並希望以新作報答大家對於《咒術迴戰》嘅支持——唔知大家係期待，定係見過鬼真係怕黑呢？

其實早於今年8月、漫畫即將完結之時，《咒》官方就已經宣佈會製作《懐玉・玉折》篇嘅劇場版動畫。而於上週末舉行嘅《Jump Festa 2025》中，就確認劇場版將於2025年5月於日本上映。《懐玉・玉折》乃係原作漫畫以至動畫都非常受歡迎嘅章節，以年青時嘅五条悟及夏油傑等人為主軸，無論劇情以至作畫都係上上之選。但要留意嘅係劇場版基本上係電視動畫第25至29話嘅濃縮版本，大不了就重新剪接或者修正部份畫面，本質上其實都係「炒冷飯」之作黎。

所以比起劇場版嘅上映日期，發佈會上更矚目嘅係作者芥見下下宣佈自己正準備緊新作。發佈會上播出芥見下下預錄嘅影片，當中佢多謝Fans們於過去7年對《咒》嘅支持，並希望於「目前準備緊嘅下一個挑戰」中，報答Fans們嘅愛戴。

由於《咒》漫畫不論作畫風格以至劇情都有極大前後對比，加上後半段劇情可謂「慘不忍睹」，漫畫完結後唔少人都猜測背後原因係芥見下下搵夠之餘，仲因為個人創意被編輯所限，但反而令作品大受歡迎而產生逆反心態，所以將作品故意畫爛，簡單黎講就即係「本Pair」。但今次宣佈準備緊新作，似乎就代表芥見下下未必有大家想像中咁嫌惡畫漫畫。至於佢畫完出黎大家賣唔賣帳啦喎……到時再算囉？