動漫作品「慘遭真人化」嘅新聞時有發，而近日又有一個大家嘅童年回憶成為荷里活新獵物。據外媒報導，著名動畫《爆丸》將會開拍真人版，並交由非常善用CGI嘅Brad Peyton一口氣擔任導演、編劇及製作人。

相信大家細個都有睇過《爆丸》呢部動畫，但你未必知道嘅係，呢部由2007年開始嘅動畫前前後後出咗7季，其中最新一季更係於2022年中先播完——日本地區於YouTube播放，美國地區則於Netflix播放，香港似乎係冇電視台引入，所以大家未必睇過。第二樣大家未必知嘅，係當年嘅「爆丸」動畫雖然係日本製作，但個IP以及玩具其實係屬於加拿大玩具廠Spin Master Corp. （旗下其他IP包括扭計骰、動力沙以及《汪汪隊立大功》）。

以上兩樣加埋，就即係《爆丸》係一個北美公司擁有、而且長出長賣嘅IP，事實上據Spin Master Corp.公佈，《爆丸》玩具及動畫歷年黎創出超過10億美元價值，咁佢哋眼見以前班小朋友依家已經長大成人、打算推出荷里活真人版賺多次錢，好似都好合理呀可？

導演Brad Peyton表示自己非常有信心可以創造出一部「忠實反映世界觀」以及「必睇」嘅《爆丸》電影。而觀乎佢過去較為出名嘅作品，例如《Journey 2: The Mysterious Island》（地心冒險2：神秘島）、《San Andreas》（加州大地震）、《毀滅大作戰》（Rampage），以至去年上映，由Jennifer Lopez主演嘅《Atlas》（異星戰境）都大量使用CGI，似乎大家都能夠估到《爆丸》電影會係咩模樣。至於係咪「必睇」啦喎……《San Andreas》係必睇，因為Alexandra Daddario正到爆。

資料來源：Deadline