作為本年度遊戲界嘅頭號大事，《GTA 6》嘅一舉一動都收到業界及玩家關注。繼早前有關《GTA 6》會否打破「3A遊戲只會賣70美元」慣例嘅討論，近日又有關於《GTA 6》（暫時）冇出PC版嘅議題興起。

話說近來唔少遊戲都係主機、PC甚至加埋Switch等多平台同時發售（例如《Civilzation 7》），但目前《GTA 6》只公佈會於PS5以及Xbox Series X/S 兩個主機平台推出，忽視近年越見強大嘅PC玩家群之外，兩大主機本身銷情並不理想亦令人對《GTA 6》嘅銷售數字產生疑問。

近日Take-Two （《GTA》系列開發商Rockstar嘅母公司）CEO Strauss Zelnick接受外媒《IGN》訪問時，就表示「我哋嘅遊戲唔係一定會多平台同時發售，而Rockstar更係有先出某啲平台，之後慢慢發展至其他平台嘅慣常做法」。換言之就即係《GTA 6》應該會有PC版，但「慢慢發展」係幾時仲係未知之數。

Strauss Zelnick於訪問亦表示，雖然PC版遊戲可能佔整體遊戲銷售嘅40%、佢亦同意PC玩家群變得越黎越重要，而且亦冇否認PS5及Xbox Series X/S嘅銷情比PC又或Switch差，但佢同時亦指出「當有大作面世——而我哋將會推出好多大作——歷史上都會帶動主機銷售」，亦即佢有信心《GTA 6》嘅吸引力可以令大家「為隻Game買部機」，所以唔使擔心《GTA 6》銷售之外，仲可以順手帶動兩大主機嘅銷售。

有趣嘅係，《IGN》報導下方有心水清嘅網民留言，表示Take-Two及Rockstar根本就唔會擔心遊戲銷情被主機銷情拖累。事關過去《GTA 5》嘅策略之一，就係隨住新主機而推出新版本，換言之一個PS玩家可能於PS3、PS4、PS5年代都分別買過《GTA 5》，甚至當PC版推出時又為更好畫質以及使用各種Mod再買一次，所以將不同版本分開買反而會賺得更多。

根據Rockstar過往做法，PC版通常會於主機版推出後一到兩年面世，換言之PC版《GTA 6》最快都要到2026年底先見街，唔知各位PC玩家係打算等，定係科水買主機「早買早享受」呢？

資料來源：IGN