導演James Cameron表示，阿凡達第三集《Avatar: Fire and Ash》已進入收尾階段，預計今年底正式上映，仲話內部試映反應良好，可能係目前為止最好精彩同感情豐富嘅一部阿凡達。

James Cameron日前接受紐西蘭傳媒《Stuff》訪問時透露，阿凡達第三集《Avatar: Fire and Ash》目前已進入後期製作嘅收尾階段，甚至有部份內部人士已經睇過早期版本：「我已經畀幾個人睇過，得到嘅反饋係，佢哋認為呢集絕對係三部曲入面最感情豐富，以及可能係最精彩嘅一部。當然，到時正式上映就見真章，但我對呢集都幾有信心。而且演員嘅表現真係非常出色，呢部電影確實令人心痛。」

除此之外，James Cameron亦透露佢計劃喺紐西蘭完成埋第四及第五部《Avatar》，預計要需時5-6年時間，並已經寫緊劇本：「我哋進展非常順利，我諗我哋已經請咗大約1,000名員工，大部份喺威靈頓（Wellington，紐西蘭首都），我哋希望喺嗰度繼續拍攝第四及第五部電影。」

據了解，《Avatar: Fire and Ash》將會講述Jake Sully同Neytiri探索未知領域，面對全新勢力「Ash Clan（灰燼族）」，一個因為文明被火山爆發摧毀，而變成充滿侵略性嘅納美人種族。Jake Sully、Neytiri、Kiri、Colonel Miles Quaritch上校、Parker Selfridge等人將會回歸，曾在《哈利波特》扮演「路平教授」嘅David Thewlis更會加盟出演全新角色，預計今年12月19日正式上映。