Netflix最新英國迷你劇集《Adolescence》（混沌少年時）憑藉一鏡到底嘅拍攝與敘事手法，加上引人入勝嘅故事情節，自3月13日開播後火速掀起影迷熱話。短短兩周已創下6,630萬觀看次數並橫掃多國收視排行榜冠軍。除咗觀眾捧場，劇集亦深受評論人讚賞，目前於影評網站爛番茄獲得99%新鮮度超高評分。

《Adolescence》目前在爛番茄上分別獲得99%新鮮度與73%影迷評分

據外媒《Variety》報導，《Adolescence》開播4天就創下2,430萬驚人觀看量，上架第二周更以4,200萬觀看次數佔據多個國家收視榜冠軍，累計觀看次數高達6630萬，破紀錄成為Netflix史上首兩周觀看次數最高嘅迷你劇集，同時亦刷新英國原創劇集歷史紀錄。按照呢個勢頭，絕對有望打入Netflix史上TOP10收視劇集排行榜！（目前第10位係《Bridgerton》第二季，累計觀看量9380萬）

《Adolescence》全季只有4集，但劇情緊湊、張力十足。故事圍繞一名13歲男孩Jamie涉嫌謀殺展開，並透過「一鏡到底」嘅拍攝手法帶領觀眾逐層拆解真相、了解事件全貌，從而帶出家庭教育、青少年心理、校園欺凌、網路文化等多個社會議題，引人深思。

最令人驚喜嘅係，劇中扮演Jamie嘅15歲童星Owen Cooper，其實係第一次做戲，而且開工第一日就係拍攝備受影迷推崇嘅第三集！初登小銀幕就能交出超水準演技，前途真係無可限量。嚟緊佢會參演《Promising Young Woman（超犀女王）》導演Emerald Fennell嘅新作《Wuthering Heights》，預計2026年上映，有興趣嘅朋友不妨多加留意。