名導演Francis Ford Coppola自己出錢拍嘅野心之作《Megalopolis》去年上映後口碑低迷、票房更僅得1400萬美金，距離收回1.2億拍攝成本可謂遙遙無期。不過自己出錢有個好處，就係Francis Ford Coppola對於銀幕上及銀幕下所有事都有絕對主導權——呢個亦係電影到依家都未有登上任何串流平台嘅原因，因為導演唔畀你哋用電視睇佢套戲！

圖片：francisfordcoppola @ IG

《THR》引述Francis Ford Coppola身邊知情人士指出，導演拒絕呢部佢稱為「藝術」嘅作品以任何方式於電視機上播放，所以《Megalopolis》唔單止唔會於各大串流平台出現（平台有冇興趣又係另一回事），甚至連DVD、Blu-ray都唔會有。大家唯一能夠睇到部嘅戲嘅方法，就係入場觀看。

事實上，上月底Francis Ford Coppola於美國拎完美國電影學會頒發嘅終身成就獎之後幾日，就飛咗去波士頓出席一個賣哂飛嘅《Megalopolis》放映會，今個月稍後佢又會出席底特律嘅另一同類放映會，似乎就係打算親身帶住套戲飛黎飛去，吸引更多人入場觀看。

圖片：IMDB

呢種巡演方式當然無助Francis Ford Coppola收回嗰1.2億拍攝成本，不過正如Adam Driver於導演獲得終生成就獎致詞時表示，拍攝《Megalopolis》嘅過程中「信我，大家從來都冇諗過點樣令套戲更加商業化」，換言之Francis Ford Coppola似乎根本冇打算收返啲錢。有錢咪就係可以咁任性囉！

資料來源：The Hollywood Reporter