如果有留意科技產品嘅朋友，應該知道科技公司好鍾意拍廣告諷刺競爭對手，抽擊對方產品痛點。隨住Google將於8月21日推出全新Pixel 10系列手機，佢哋最近就出咗條廣告，諷刺Apple承諾嘅「新Siri」至今仍未見蹤影，與其無了期咁等待，不如直接換過部新電話。

在預告中，旁白語重心長地表示：「如果你因為一個即將推出嘅功能而買一部新電話，但『即將』咗整整一年都未推出。你可以重新定義『即將』嘅意思，又或者你可以...直接換過部電話。」然後背景隨即響起Dr. Dre嘅經典歌曲《The Next Episode》，除咗諷刺味道十足，同時又意味住「下一代」Pixel手機即將登場。

片中諷刺緊嘅係，Apple在去年6月WWDC 2024大會上，曾表示Siri將整合AI功能，變得更強大、更個人化，能夠於App內甚至跨App進行操作，例如叫Siri幫你將一張相加上濾鏡再email畀某朋友。而Apple亦在去年9月發布iPhone 16時，表示手機「即將」會搭載呢個全新Siri，結果時至今日都仍未推出。