由日本漫畫家土筆章人創作嘅奇幻漫畫《來自深淵》，憑藉畫風可愛但劇情暗黑獵奇嘅強烈反差，成功俘獲大批Fans。繼2022年第二季電視動畫《來自深淵 烈日的黃金鄉》播映完結後，近日官方終於有新消息，宣布將推出一系列劇場版動畫，第一部《來自深淵 覺醒的神秘》預計明年正式上映。

隨住新劇場版宣布製作，官方同步公開首張視覺圖，展示兩位新登場角色「媞帕絲特」及「格萊瓦利」出現在探窟家酒吧「滑落亭」嘅畫面。新作將繼續由製作過兩季電視動畫同2020年劇場版《來自深淵 深沉靈魂的黎明》嘅Kinema Citrus負責操刀，而小島正幸及倉田英之亦會回歸擔任導演及編劇。

除此之外，為慶祝新劇場版即將上映，官方宣布將於2026年2月8日喺東京中野ZERO主廳舉行首場電影音樂會，並由負責配樂嘅Kevin Penkin親自指揮。另外，今年秋季仲會舉辦以「波多爾多」為主題嘅POP UP商店，售賣香水同香氛等產品，有興趣嘅朋友可以到官方網站了解更多。