大家或者有印象，早年《Hunter X Hunter》長期休刊時，有個日本Fans自發進行「《Hunter》連載再開前每日一萬下感謝正拳」活動，每日就係影住自己學尼特羅會長咁打一萬下正拳（第二日起變咗1000下），最後佢亦真係打到2022年《Hunter》連載再開，證明有時Fans為咗自己鍾意嘅作品，真係可以付出非常多。而近日隨住《Hollow Knight》續作《Silksong》（絲綢之歌）推出，亦有Fans完成類似創舉！

話說《Hollow Knight》於2017年推出之後就吸引到一大班忠實Fans，2019年宣佈會發行《Silksong》（當時定位仲係DLC）後Fans自然引頸以盼。但除咗開頭幾個月有些許消息之外，往後一年連樓梯響都聽唔到。咁啱呢個時候有位叫「Araraura」嘅Fans留意到隔離《Elden Ring》Fans中，有人於YouTube上製作「每日新聞」，於是就打算仿傚對方，並於2021年1月16日成立YouTube頻道「Daily Silksong News」，每日更新有關《Silksong》嘅新聞，並慢慢成為《Hollow Knight》系列愛好者之間嘅聚集地。

我諗連佢自己都估唔到嘅係，《Silksong》最後要等到5年幾後嘅今日（9月4日）先正式推出，而佢就真係做足五年幾嘅嘅「每日新聞」。而隨住遊戲推出，「Daily Silksong News」亦於昨日推出最後一條影片，宣告等待結束。

睇到呢到你可能會問：「乜隻Game日日都有新聞可以講咩？」答案係「無」嘅！所以除咗偶爾會提到真正嘅新聞、有時會發揮創意搞下笑之外，其實「Daily Silksong News」上絕大部份嘅影片都係得一句：「今日係XXXX年X月X日，我係你哋嘅主持人Araraura，將會為你帶來《Silksong》嘅每日新聞。今日，無《Silksong》嘅新聞。以上就係XXXX年X月X日嘅《Silksong》每日新聞。」有時條片連30秒都無。

不過遇到特別日子時，條片就會長啲。好琴晚發佈嘅最後一條片，Araraura本人就親自出鏡，回顧過去1694日嘅回憶，最後高呼「隻Game今日推出，我可以有信心咁話，呢個就係我…唔係，係『我哋』嘅《Silksong》每日新聞！」同時亦宣佈頻道完成歷史任務。

資料來源：IGN