傳統漫畫可以分成兩大陣營，一係大家由細睇到大嘅日漫、一係以Marvel、DC為首嘅美漫，二者過去多年黎雖然偶有交集，但大致上都係壁壘分明各自發展。不過近來日本講談社旗下嘅《週刊Young Magazine》就有意進軍美國市場，為此特意製作一本全新嘅《Yamaga USA》(Young Magazine縮寫），希望吸引更多美國漫畫迷。

今次推出《Yamaga USA》，除咗係為咗慶祝《Yamaga》創刊45週年以外，其實亦係睇到日本動漫於國際，特別係美國嘅影響力越來越大嘅反應，希望正式進軍美國市場分一杯羹。《Yamaga USA》封面搵黎於美國極具人氣嘅《攻殼機動隊》作者士郎正宗執筆，入面收錄《頭文字D》作者重野秀一、《惡之華》押見修造以及《不安的種子》中山昌亮等十九名漫畫家嘅全新作，並花咗超過一個月時將過千頁漫翻譯成英文。而且翻譯細節亦見心思，部份連外國人都熟悉嘅日本單詞例如「異世界」(isekai)、「前輩」(Senpai)等只係改用羅馬併音，以保留日漫氣氛。

另外編輯部亦留意到，比起日本漫畫迷著重劇情，美國漫畫迷較為著重漫畫本身嘅筆功細節、每頁嘅閱讀時間亦比日本讀者長，所以刻意收錄畫風精細嘅漫畫以投其所好。部份作者甚至刻意改用更簡單嘅分鏡，以迎合美國Fans嘅觀看習慣。

由於目前美國主流嘅日漫都係以「熱血、友情」嘅少年漫為主，為咗展現日漫嘅深度，所以《Yamaga USA》選擇青年向嘅「無濾鏡漫畫」(UN-filtered MANGA) 為主題。雖然收錄嘅漫畫涵蓋科幻、恐怖、Cyberpunk等多個風格，但作品嘅主題均撇開少年漫常見嘅美好、浪漫濾鏡，改以展現真實人性故事及當中嘅選擇，甚至仲有LGBTQ主題漫畫，以配合美國當地文化。

雖然《Yamaga USA》係作為特刊於8月舉行嘅「ANIME NYC」中發售，但入面嘅漫畫未來將以連載方式繼續推出。編輯部亦指出如果作品於美國反應良好，有可能會於「回流」於日本推出。換言之未來可能會有由美國紅返日本嘅日漫出現。

資料來源：宅宅新聞、entax.news