深受高達迷歡迎嘅《閃光之凱薩衛》續集《閃光之凱薩衛 瑟茜的魔女》終於確定上映日期，並同步公開正式預告及主視覺圖。各位Fans係時候返去重溫定第一集，準備迎接全新篇章喇！

喺呢部續集故事中，凱薩衛將會繼續喺對琪琪嘅感情同馬法狄任務之間掙扎。與此同時，聯邦軍上校堅尼斯將全力鎮壓馬法狄。唔知琪琪嘅存在，會點樣改變呢個兩男人嘅命運呢？目前電影已確定將於2026年1月30日在日本上映，但香港方面就暫時未有消息。

《閃光之凱薩衛》改編自高達之父富野由悠季在1989年至1990年撰寫嘅同名小說，故事設定在《馬沙之反擊》12年後嘅U.C. 0105年，聯邦政府繼續官僚腐敗，為咗令少數特權階段能獨佔地球，用上武力將普通市民驅逐到宇宙，並成立特殊部隊「MAN HUNTER」追捕所謂嘅「非法居民」。為反抗聯邦嘅腐敗行徑，一個名為「馬法狄」嘅反政府組織應運而生，專門策劃恐怖襲擊同暗殺聯邦高官，而布拉度艦長個仔凱薩衛亦加入其中，並成為了該組織領袖，展開激烈抗爭。