《Alien》系列雖然一直都有新作，但對唔少影迷黎講，最好睇嘅始終係由Sigourney Weaver主演嘅幾部「正傳」最好睇。而黎緊大家又真係有機會見到佢再演Ripley！因為佢近日親口確認系列製作人Walter Hill邀請佢出演系列續集。

早於今年初時，著名荷里活記者Daniel Ritchman就已經爆料，指20th Century Studio有意搵Sigourney Weaver以AI減齡技術再次出演Ripley一角，不過當時估計係會於《Alien: Romulus》嘅續集中出現。而近日Sigourney Weaver出席紐約動漫展時，就確認真係有可能回歸，但出演嘅電影似乎就係正傳嘅續集。

「Walter Hill係我嘅好朋友，而佢寫咗五十頁劇本講述Ripley依家做緊咩，仲寫得非常唔錯。我唔知係咪真係拍得成，但我已經同…依家係Fox定Disney話？反正就同佢哋開過會。除咗之前Neill Blomkamp搵我（最後拍唔成嘅《Alien 5》）之外，我一直都覺得無需要再畀呢個角色出場，畀佢抖下啦！但Walter寫嘅嘢，對我而言非常真實，係關於社會點樣關禁一個曾經試圖幫助人類嘅人，因為覺得佢係個麻煩，所以佢就被藏起來…反正我覺得嗰50頁好有力量，我有考慮同Walter一齊將個故事發展落去。」

Sigourney Weaver亦強調呢個故事於其他《Alien》電影會有啲唔同：「唔會再喺通風管跑黎跑去，而係與別不同、有好劇本支撐嘅《Alien》電影。會嚇人，異形亦當然會出現。我真係好鍾意Walter同Ripley嘅理解，真係捕捉到佢嘅力量、憤怒與幽默。」

據Sigourney Weaver嘅說法，呢部新《Alien》電影目前應該係劇本都未寫好，所以距離開拍甚至上映肯定有好長時間。但假如有一日真係見到佢回歸《Alien》系列，相信Fans都等得心甘情願嘅。

資料來源：Josh Horowitz Clips