隨住《X-Men》版權重歸Disney手上，而Channing Tatum本人又於《Deadpool & Wolverine》中演Gambit一角，或者唔少人都期待佢口嗰套講咗好多年嘅《Gambit》獨立電影有望開拍。不過近日Channing Tatum就透露，就算真係拍得成，套戲嘅故事都唔會係佢當年構思嗰個：事關想拍嘅係一部有變種人性愛畫面嘅R級電影，「Disney唔會批啦！」

Tatum 透露，佢當年為二十世紀福斯開發的版本，係一套「R 級浪漫喜劇」，設定比一般英雄電影更大膽。「如果真係照當初Fox個版本去寫，個劇本一定無可能完成。我哋真係放膽去試。我哋將Gambit寫成一個只能於《Deadpool》電影中出現嘅角色，甚至仲有變種人性愛橋段！夠癲呢？」

佢又補充，Marvel 同 Disney 有清晰品牌界線：「你未必知道Disney係啲咩，但你一定知道佢唔會係咩——唔會係恐怖、唔會係性愛。」不過佢亦指出，Marvel 其實需要「多樣性」，「應該有唔同類型嘅作品去平衡整個宇宙，《Gambit》其實係一個好機會。」

目前 Tatum 雖然未能如願拍成《Gambit》，但佢仍會於明年上映的《Avengers: Doomsday》中回歸，同其他 X-Men 時期演員一齊登場。至於 Gambit 會唔會再有獨立電影、拍到出黎又會唔會當初設想咁刺激啦喎……等下囉！

資料來源：IGN