早前我哋同大家報導過，因應Open AI旗下早前推出嘅影片生成AI 「Sora 2」中使用大量未經授權嘅日本動漫素材，所以日本政府公開要求Open AI作出改善。而近日各出版社亦有所行動，講談社、小學館、双葉社、白泉社等發表聯合聲明，要求Open AI保障版權；而集英社亦於同日單獨發表聲明，甚至揚言會採取法律行動。

話說上週五時，日本動畫協會、日本漫畫家協會聯同講談社、小學館等共19個團體發表表聯合聲明，當中指出大量使用Sora 2製作嘅影片或圖片「極有可能係基於或模仿著名動漫IP」，並表示雖然佢哋「歡迎生成式AI嘅進步」，但「重申我們對侵犯版權行為零容忍的原則」。

另外佢哋亦批評Sora 2目前嘅「Opt-out」機制——即係「你唔提出反對我就可以用」——違反《著作權法》中「使用前須獲得權利人許可」嘅條件，並要求Open AI往後改用「Opt-In」（即「你講到明接受我先可以用」）機制，並向版權持有人提供補償。聲明同時亦要求AI開發公司未來要公開訓練資料庫，以便版權持有人確認是否有侵權行為。

而集英社亦於同日發佈類似聲明，不過其語氣就明顯比上面嘅聯合聲明更強硬。集英社直接稱Sora 2生成嘅動漫風格內容「踐踏傾注心血的藝術家尊嚴和侵犯其他眾多藝術家的權利」，並指「除非生成式人工智慧服務立即實施有效的侵權應對措施，並為權利持有人提供超越『Opt-out』機制的補救措施」，否則類似嘅惡性循環將持續，「並不斷侵蝕內容產業的根基」。

集英社最後表示，無論係唔係由生成式AI製作，佢哋對於任何可能嘅侵權內容都會採取適當及嚴格的措施。

資料來源：講談社、集英社