綜合多間外媒報導，在美國總統特朗普親自施壓兼游說之下，派拉蒙影業將接手籌拍《火拼時速（Rush Hour）》第4集，並請回曾因「#MeToo」爭議而淡出多年嘅Brett Ratner回歸執導，而系列兩大靈魂人物成龍同Chris Tucker亦有望回歸。

據《The Guardian》及《CNBC》報導，曾執導前三集《火拼時速》，自2017年陷入「#MeToo」指控後事業急轉直下，雖然多年嚟一直向多間片商推銷《火拼時速4》，但始終無人問津。直到美國總統特朗普出手，親自遊說好友兼金主Larry Ellison（甲骨文公司創始人、派拉蒙新任董事長David Ellison嘅爸爸），最終促成計劃落實。值得一提嘅係，Brett Ratner近年因為執導美國第一夫人Melania Trump紀錄片而同特朗普家族關係變得密切，呢部紀錄片仲被Amazon以4,000萬美元買下，預計明年1月底正式上映。

消息人士更透露，派拉蒙今次將獲得一筆「固定發行費」負責院線上映，毋須投放市場宣傳或承擔製作成本。而原本打造系列嘅華納兄弟（旗下New Line曾主導1998年首集以及2001、2007年續集）則會分得「首輪票房分紅」，即在投資方回本前已可按比例抽取票房收益。

《火拼時速》系列當年憑住融合動作、喜劇、緊張刺激元素叫好又叫座，1998年首集全球勁收2.44億美元，除咗奠定成龍國際影壇地位，Chris Tucker亦躍升為一線巨星。其後2001年及2007年兩部續作雖然評價一般，但都分別獲得3.47億及2.58億美元可觀票房。不過，距離上集已經差唔多成20年，動作喜劇喺院線嘅吸引力已大不如前，加上成龍今年71歲，而Chris Tucker亦自2007年後再無領銜主演大作，《火拼時速4》最後會點安排，會否另覓演員仍然係未知之數。