由Sony Pictures Television及Amazon MGM合力製作、改編自同名遊戲嘅《God of War》真人版劇集再有更新。據《Deadline》報導，劇組搵黎去年啱啱憑FX劇集《幕府將軍》拎到艾美獎最佳導演嘅「Frederick E. O. Toye」加盟，為《God of War》頭兩集執導；同時劇集亦於溫哥華正式展開前期及選角工作，可能好快就可以進入拍攝。

圖片：IMDB

「Frederick E. O. Toye」係美劇界享負盛名嘅名導之一，而且近年非常多產。例如去年上線嘅《幕府將軍》中，就有4集係由佢執導，當中包括最終拎到艾美獎嘅季終第十集；同年上線，叫好叫座嘅遊戲改編作《Fallout》中亦有兩集係由佢執導。另外「Frederick E. O. Toye」亦曾參與大量有名美劇嘅製作，包括但不限於《Westworld》、《The Walking Dead》、《Lost》、《Alias》、《Watchman》、《The Boys》等等等等，絕對稱得上係質素保證。將《God of War》首兩集交畀佢亦應該可以開個好頭！

《God of War》真人版劇集最早於2022年獲得Amazon MGM「開綠燈」通過，不過往後幾年一直未有真正動作，直到去年秋天Ronald D. Moore成為製作人開始先有所進展。最新報導亦指出《God of War》正於加拿大溫哥華開始前期工作及選角試鏡，雖然目前未知演員陣容，但都算係步入正軌，可能明年就正式開始拍攝。

今年稍早時，Amazon MGM亦加碼續訂第二季，一方面係因為製作《God of War》所需嘅世界觀（場景、戲服等等）成本高昂，拍多幾集可以攤分成本，另一方面亦表示出佢哋對劇集嘅信心。

資料來源：Deadline