自從Capcom宣布開發《生化危機9 安魂曲》（Resident Evil Requiem），並透露遊戲舞台將重返系列經典地點浣熊市（Raccoon City）後，網上一直盛傳Leon會再度登場，但始終都係得個傳字，直到近日終於有較為可靠嘅線索！

據外媒《IGN》報導，有唔少已預購《生化危機9》標準數位版嘅PS5玩家，最近發現PlayStation Store內嘅遊戲封面圖忽然悄悄更新。新封面除咗見到新主角Grace Ashcroft之外，背後仲有一個滿臉鬍渣、神情略為憔悴、身穿羊毛領皮褸嘅Leon，造型近似《生化危機4》時期嘅經典形象。

Capcom過去一直對Leon回歸嘅傳聞保持模糊態度，唔確認又唔否認，仲係提醒大家網上啲所謂嘅「Leon造型洩密照」係AI假相。而製作人熊澤雅登亦只係賣關子表示：「會有啲過往角色回歸」，但同時叫玩家唔好有過高嘅期望同亂炒作。

不過今次PlayStation Store嘅意外洩密，幾乎可以確認呢位經典角色將於新作再度登埸，但會以咩方式回歸，係咪可以操控，定還是只係客串過場動畫就唔太清楚。預計Capcom將於星期五（12日）上午8點30分舉行嘅「TGA 2025」公開更多信息，敬請期待。