Capcom早前於TGA 2025公開《生化危機9 安魂曲》（Resident Evil Requiem）最新預告，正式宣布系列人氣角色Leon S. Kennedy強勢回歸，令Fans們興奮不已。製作團隊其後亦進一步透露，Leon同新主角Grace將各佔一半戲份，一個負責恐怖生存情節，另一個就負責動作射擊，為玩家帶嚟兩種截然不同嘅遊戲體驗。

遊戲總監中西晃史及製作人熊澤雅登接受外媒《AUTOMATON》訪問時透露，雖然遊戲只有一條故事線，但隨住劇情推進，玩家將會喺Leon同Grace兩位主角之間切換，兩人出場時間大約各佔一半，結構上會有啲類似2012年嘅《生化危機 啟示》。中西亦將Grace形容為《生化危機》系列中最膽小嘅角色，而Leon就係久經沙場嘅老手，兩個性格反差極大嘅角色互動，將會成為遊戲一大賣點。

中西指出，呢種混合兩種完全唔同張力嘅玩法，團隊起初都擔心玩家會跟唔上，但而家反而覺得呢種強烈對比，可以令遊戲有一種好獨特嘅節奏，就好似喺熱辣辣嘅桑拿房坐完後，即刻跳入冰冷嘅凍水池。而Leon亦會有更多全新動作（預告甚至見到Leon用電鋸斬喪屍），對比起Grace嘅關卡，玩落會有一種更強烈嘅「釋放感」，緩解玩家扮演Grace時所經歷嘅強烈恐懼。

另外，中西亦透露團隊花咗好多心思，將Leon塑造成一個「帥氣迷人嘅成熟男性」，畢竟公司內部有唔少Leon忠粉，而預告片嘅正面迴響亦令團隊相當鼓舞。有趣嘅係，Capcom今次仲同保時捷合作，特別為Leon度身訂造一部Cayenne Turbo GT作為專屬座駕，果然係「薪水最高嘅男人」。不過熟悉《生化危機》系列嘅玩家都知道，Leon向來有「載具殺手」之稱，用過嘅交通工具幾乎無一幸免，所以記者都忍唔住打趣問呢部車會唔會報廢。對此，熊澤笑住回應：「通常被炸嘅都係直升機啦……」而中西就賣關子表示：「今次會發生咩事，就敬請大家期待啦。」

《生化危機9 安魂曲》將於2026年2月27日登陸PS5、Xbox Series X|S、Switch 2及PC平台，目前已開放預購。