Warner Bros. Discovery (WBD）收購案又有重大發展。WBD高層於美國時間昨日向股東發信，表示佢哋已經拒絕由Paramount Skydance (以下簡稱Paramount）提出、總值1080億美金嘅收購案，並指Netflix提出嘅收購案比起Paramount嘅於多個方面都更加優越。WBD高層同時提醒股東，Paramount未能就收購案提供資金擔保證明，亦即後者有可能根本無咁多錢作出收購。

WBD高層於信中表示佢哋檢視過Paramount提出嘅收購案後，一致認為Netflix嘅收購案更值得推薦，並建議股東拒絕Paramount方案。信中指出Paramount收購案不能提供足夠嘅價值，並會為公司帶來多個嚴重嘅問題及高昂嘅成本。

WBD高層亦指Paramount多次「誤導」WBD股東，指其收購案獲得Ellison家族——主要係指Paramount主席David Ellison個老豆，身家有2000億美金以上嘅Oracle創辦人Larry Ellison——嘅「全面擔保」，但實情係「沒有，從來都沒有」，而係只依靠一個「不透明而且可收回嘅信託基金來確保關鍵資金」。而且礙於基金與Paramount之間嘅協議，一旦發生違約情況（即係話買最後買唔成），賠償金額最高只有協議金額嘅7%，遠遠不足以彌補違約對WBD及股東們造成嘅損失。

圖片：Wikicommons

相比之下，Neflix嘅收購案係一份有約束力協議，而且Netflix本身就值4000億美金，無需融資或大幅舉債就可以完成交易。反之Paramount市值僅150億，而且其信用評級於兩大主流評級機構「僅略高於『垃圾級』或直接處於『垃圾級』」，融資能力明顯不足。即使Paramount能夠舉債籌得收購資金，其EBITDA槓桿比率亦會高達「6.8 * 2026E」，顯示其資本結構有嚴重風險。

WBD高層於信中亦表示，其實呢啲理由佢哋於Paramount過去6次提出收購時就已經反映過，但對方一直都未能提出優於Netflix嘅提案。信尾段更直言Paramount提案係「虛幻」。

而據《Variety》報導，在WBD宣布消息後，Paramount確認將維持向股東以每股30美元直接收購股份嘅惡意收購提案。

資料來源：Variety