唔少PS玩家細個都係玩老翻Game長大，係到大個一來自己有錢、開始尊重版權，二來PS主機嘅防護機制越黎越難破解先開始養成玩正版嘅良好習慣，但呢個情況好可能於短期內有巨大改變。

據《TheCyberSecGuru》報導，於12月31日除夕晚上，有人於「psdevwiki.com」及其他私人Discord伺服器中，投放大量PS5嘅破解數據，當中更包括處於PS5防護機制核心、Sony無法修復嘅「硬體金鑰」 (BootRom) 。意味住市面上嘅所有PS5都將能「越獄」，盜版遊戲、PS5模擬器等亦可能於短時間內應運而生。

PS5 BootRom金鑰

所謂「BootRom」係PS5開啟電源後第一組運行嘅代碼，係主機硬體、Bootloader、作業系統以至遊戲之間「信任鍊」基礎，而當BootRom被破解之後，就意味住整個「信任鍊」嘅基礎被攻破。雖然唔代表即刻可以於PS5主機上運行盜版遊戲，但就代表後續破解Bootloader、作業系統等軟體嘅難度大幅下降。

而當PS5整體被破解後，玩家就可以於PS5上運行第三方軟件，屆時唔單止係「老翻Game」，甚至可能會有人將PC Game移植至PS5之上。另外模擬器開發者亦可以利用BootRom改善程序，令模擬器嘅相容性及效能大幅提高。屆時唔少玩家夢寐以求嘅60FPS版本《Bloodborne》，可能唔需要官方重製就可以達成。

圖片：ImageFX

過去PS5曾經被破解系統核心（Kernel）和 WebKit 瀏覽器，但呢啲都屬於軟件層面嘅破解，Sony只需要推出修復更新就可以解決。而BootRom係鑄刻於主機APU處理器之中，換言之不能透過軟件更新解決，亦即Sony無辦法修復問題。

目前估計Sony能做嘅，一方面係杜絕BootRom繼續於網上流傳，並作出法律行動，另一方面就係加快推出有不同BootRom嘅新版本主機，以取代已被破解嘅版本。但對於已賣出嘅主機基本上係無計可施。

資料來源：TheCyberSecGuru