隨住電影公司不斷合併、串流平台急速崛起、加上整體票房持續下滑，奧斯卡影帝Leonardo DiCaprio對電影院未來感到擔憂，甚至質疑戲院最後會唔會變到好似Jazz Bar咁，只剩下一小撮發燒友撐場。

Leonardo DiCaprio近日接受《The Times》訪問，諒到電影業現況時直言，整個行業正以「近乎光速」嘅速度轉變：「我哋正經歷緊一場巨大變革。首先，紀錄片已經喺戲院消失；而家，就連劇情片都只得好短嘅上映時間，大家都寧願等上架串流平台先睇。我都唔知未來會點。大家仲有興趣（入戲院）嗎？定係戲院將會變成好似Jazz Bar咁小眾？」話雖如此，但Leon都希望未來嘅電影人，仍然有機會將作品放到大銀幕放映：「我只係希望，未來依然會有一班真正有遠見嘅人，能夠有機會做一啲獨特嘅作品，並放喺戲院大銀幕放映。不過，呢樣嘢能否實現仍有待觀察。」

作為電影藝術完整性（cinematic integrity）嘅堅定捍衛者。Leon早前接受《Time》雜誌訪問時就狠批電影創作唔應該引入AI，並直指呢種技術缺乏人性，根本唔可以被視為真正嘅藝術：「AI或者係一種強大嘅工具，幫助年輕電影人創作前所未見嘅畫面。但我認為任何真正嘅藝術，都一定要出自人類之手。否則嘅話...你有冇聽過個Mashup歌？係就係好精彩，你會驚嘆：『OMG，呢首用Michael Jackson聲線唱The Weeknd嘅歌。』又或者『呢首係A Tribe Called Quest名曲《Bonita Applebum》嘅Funk版，仲要用Al Green嗰種Soul唱腔重新演繹，真係太正啦。』不過呢啲作品紅咗15分鐘後，就會消失喺空氣中，沉沒喺其他互聯網垃圾之中。嗰啲缺乏根基、冇靈魂、冇人性，就算幾精彩都好，都係假嘅。」