對唔少七、八、九十後機迷而言，實體Game鋪可以話係充滿童年回憶嘅地方。由細個得個望字，到大家有錢可以自己買機買Game，呢啲回憶片段對唔少人黎講應該都仲歷歷在目。不過隨住近年越黎越多人線上買Game，實體Game鋪嘅生存空間亦大減。近日更有報導指出，美國著名連鎖Game鋪「GameStop」將會於今個月內關閉超過470間分店，兩年間分店數銳減超過1,000間，似乎證明實體Game鋪慢慢被市場淘汰。

圖片：Wikicommons

據《The Verge》及《Polygon》引述一個由網民及GameStop員工自發整理嘅部落格帖文，GameStop將於本月31日財政年完結之前，關閉超過470間美國分店。而如果計埋去年12月GameStop於上市文件中披露、已於2025年內關閉嘅590間，加埋就已經關閉超過1,000間分店。若按2025年2月時GameStop公佈嘅全美分店2,325間黎計，即有超過4成分店不再存在。

事實上除咗關閉分店外，GameStop近年亦不停調整分店嘅市場定位及功能。部份分店集中販售復古遊戲及主機、有啲就加入玩具、收藏品等擴大客源。此外GameStop亦試圖於卡牌交易佔一席位，除咗與PSA合作為客人嘅卡牌進行認證之外，12月時亦舉行「Trade Anything Day」試圖製造話題。種種跡象都顯示，單靠賣Game賣機已經不足以支撐實體Game鋪嘅存在。

GameStop CEO Ryan Cohen

圖片：Wikicommons

此外，多間媒體都指出GameStop CEO Ryan Cohen與公司有協議，只要GameStop嘅市值能夠達到1000億美金，佢就會獲得價值350億美金嘅股票期權，而且係佢作為CEO嘅唯一收入來源。而截至目前為止，GameStop市值「僅為」95億，所以需要大刀闊斧嘅改革先有望將市值提升10倍以上，而裁減成本就係改革嘅其中一個方法。換言之於CEO被「利誘」之下，未來可能會有更多GameStop被關閉。

資料來源：The Verge、Polygon