由孩之寶推出嘅《魔法風雲會》卡牌擁有一班忠實擁躉，而且近年收藏炒賣熱潮之下卡牌價值水漲船高，睇落好似一切都順風順水。不過近日孩之寶及管理層就遭到股東提告，指佢哋將《魔》當係公司嘅「降落傘」濫發卡牌，導致卡牌價值下跌；同時佢哋亦指控孩之寶於2022年推出《魔》三十週年紀念版時決策失誤，導致大量卡牌被丟棄至堆填區，浪費公司資源。

圖片：https://flic.kr/p/LLCypD

「降落傘策略」掩飾虧損？

話說兩位孩之寶股東日前向美國法院入稟，提告孩之寶CEO Christian Cocks及一眾高層「違反信託義務、不當得利、浪費公司資產、嚴重管理不善、濫用控制權、違反證券交易法」等多條罪名。於76頁嘅狀書中，原告指出孩之寶管理層近年將《魔》當係公司嘅「降落傘」，每當公司有其他業務成績唔好、公司需要賺錢時，就會推出新嘅《魔》牌組黎賺錢，導致《魔》卡牌發行量於2021年至2023年間「爆發性增長」，結果供過於求令卡組嘅價值下跌。

兩位原告嘅說法其實不無道理。據「jacobwillson2727」於2022年整理嘅「《魔》過去三十年產品圖」中，可見2018年前《魔》每年大約會推出十令套不同卡組，但到2020年後就變成每年幾十套，2022年時更加高達74套。

30週年紀念版

新版「黑蓮花」

圖片：magic.wizards.com

$999套裝「賣晒」？員工爆料見到卡牌被丟去堆填區

而狀書中對孩之寶嘅另一指控就更為具體。話說2022年時因應《魔》三十週年，孩之寶宣佈推出價值999美金嘅30週年紀念版，當中包括4個補充包，而包內就係不能於比賽中使用嘅原版重印卡。呢個30週年紀念版不單止因為太貴而被批評，亦打破咗「唔會重印『黑蓮花』等原版卡」嘅承諾，導致Fans們強烈反彈。

而據原告指出，當時孩之寶管理層眼見群情洶湧，於是下令「暫停」出售紀念版，但就用X對外暗示係「賣哂」。原告們引述匿名員工指，原本已經印好嘅紀念版只有小部份被出售，其餘嘅都被運到德州一個堆填區被廢棄。

基於上述理由，兩位原告要求所有被告嘅管理層向公司作出賠償，同時亦要求股東於公司未來決策上有更多話語權。

資料來源：IGN