曾於TGA 2023橫掃多個大獎嘅奇幻RPG《Baldur’s Gate 3（柏德之門3）》，正式宣布將改編成真人版電視劇，並由HBO負責製作、真人版《The Last of Us（最後生還者）》主創Craig Mazin親自操刀，劇情將延續《Baldur’s Gate 3》大結局後嘅故事線，探討世界劇變後嘅新篇章。

據外媒《Deadline》報導，呢部真人版劇集並非單純重拍遊戲內容，而係直接承接《Baldur’s Gate 3》結局後嘅發展，並搵嚟Craig Mazin操刀，同時擔任主創、編劇、執行監製及節目統籌。

對於今次合作，本身就係遊戲鐵粉嘅Craig Mazin興奮表示：「喺《Baldur’s Gate 3》投入將近1000小時後，能夠延續Larian Studios同Wizards of The Coast創造嘅故事，簡直係夢想成真。我一直都係《D&D》嘅忠實擁躉，亦非常欣賞Swen Vincke同佢嘅團隊將呢個系列改編得如此精彩。我已經迫不及待要以最大嘅尊重同熱愛，將《Baldur’s Gate》同一眾令人難忘嘅角色帶到電視螢幕上，同時亦非常感激Hasbro團隊將呢個重要嘅IP交託畀我。」

由於呢部劇集同其他正在開發中嘅《Baldur’s Gate》遊戲並冇關聯，所以Craig Mazin將會擁有相當高嘅創作自由度，可以預計劇集將會同時出現遊戲中嘅舊有角色，以及全新角色。報導更提到，Craig Mazin已主動聯絡《Baldur’s Gate 3》嘅原班配音員，了解佢哋所扮演嘅角色，甚至邀請對方參與演出。做法就好似真人版《The Last of Us》邀請 Marlene 配音兼動作捕捉演員Merle Dandridge回歸，親自出演同一角色。

值得一提嘅係，《Baldur’s Gate 3》其中一大特色，就係結局會因玩家選擇而出現巨大分歧，因此Craig Mazin揀選邊一個結局作為「官方正史」，同時又唔會得罪選擇咗其他路線嘅玩家，無疑會係今次改編嘅一大挑戰。至於幾時播出，由於Craig Mazin目前仍忙於製作《The Last of Us》第三季，《Baldur's Gate》真人劇相信仍需一段時間籌備，短期內未必會同觀眾正式見面。