PlayStation喺今朝舉行嘅State of Play發布會上壓軸宣布，PS2/3年代嘅神級經典《God of War》希臘三部曲即將推出重製版（remake），而初代配音員TC Carson亦會回歸再度聲演主角Kratos。各位戰神Fans，係時候準備好再次體驗嗰種最原始、最血腥嘅復仇之旅！唔知會唔會保留返原版個啲「小遊戲」呢...

隨住《God of War》系列即將踏入20周年，官方今日邀請到初代Kratos配音員TC Carson現身親自宣布，分別於2005、2007及2010年推出嘅《God of War》三部曲將進行完全重製（Remake）。意味機迷能以次世代畫質，重新經歷Kratos手撕眾神、抆甩太陽神Helios個頭當電筒用、生劏泰坦巨人Kronos等震撼眼球場面。不過，官方表示計劃目前仍處於「早期開發」階段，只係得個標題Logo，具體內容及發售日期仍有待後續公布。

除咗重製版呢個「主菜」，官方亦準備咗個「頭盤」畀大家止渴。宣布一款2D橫向捲軸動作新作《God of War: Sons of Sparta》將於今日即時上架。遊戲設定在Kratos嘅年輕時期，講述佢同細佬Deimos接受斯巴達式訓練嘅經歷，兩兄弟拍住上用長矛同盾牌對抗形形色色的敵人。喺等重製版出街之前，不妨打住呢隻頂癮先。