人氣動畫《PSYCHO-PASS》最近成為熱門cosplay對象，事關一班型仔執行官同監視官只係搞下個頭、換套西裝就cos得到，不過要cos得神似就一定要加埋呢把識得自動變形嘅Dominator先得！

《PSYCHO-PASS》呢套由《大搜查線》導演本廣克行監督嘅科幻動畫，同攻殼機動隊一樣出自Production I.G，來頭唔少，角色設計討好加上大量Cyber Punk元素，所以一出就大受歡迎，而一班主角用嘅自動變形武器Dominator更加係動畫嘅一大特色。

其實之前已經有好幾間廠都出過呢支槍，但今次由Cerevo推出算係還原度最高，事關細節做足之餘仲識得變形。成支槍用咗超過100粒LED燈，燈光會因應通常時、變形時同埋執行時3種形態作出變化，跟足原著。除此之外，手柄位仲加入咗touch sensor，識得感應持槍人而自動播出日高範子錄製嘅語音，如果其他人拎起就會播出不正當使用者嘅音效，跟足原著。

Dominator嘅大特色就係可以探測目標人物嘅犯罪指數，所以Cerevo呢支槍就內置鏡頭，然後利用WiFi連接手機就可以睇到犯罪指數，同時支援拍片同影相，而且Dominator仲會因應犯罪指數而變形至唔同形態。不過未知會支援乜手機，但睇設定就似係Android手機居多，售價5萬yen起，官網話暫定今年中推出，不過家陣咪已經年中囉？