圖片：independent.co.uk

上星期日晚英格蘭足總盃十六強車路士主場迎戰曼城，大家賽前相信都會預計有一番龍爭虎鬥，點知曼城竟然出一大班青年軍再加幾個一隊後備出戰，被傳媒戲稱呢隊曼城叫「曼城B隊」，結果車仔就以5-1輕取曼城。雖然大敗俾競爭對手，不過睇返一部份曼城球迷嘅群組，好似輸得好高興，因為上半場班年青球員打得有板有眼，仲入到車仔波，證明曼城青訓有希望。而事實曼城嘅青訓近年進步神速，就連死敵曼聯部份著名球星好似安迪高爾、菲臘尼維利、費查都送囝囝去曼城受訓，你就知有料到，今次就一齊睇下曼城幾個有望上位嘅青年軍球員呢。

圖片：goal.com

#72　伊恩拿祖

年齡：19

國藉：尼日利亞

位置：前鋒

都唔使多介紹，因為佢已經喺一隊有一定出場機會，2014年先加盟曼城，今季因為迪斯高同祖維迪離隊，加埋阿古路同邦尼經常受傷所以得到唔少上陣機會，唔講唔知原來伊恩拿祖今季已經入咗9球，19歲嘅前鋒嚟講算幾勁。本身有速度，技術又唔差，身高仲有成1.89米，喺球隊進攻未有任何寸進時派佢出嚟往往有驚喜，好似今季主場對水晶宮就係臨完場靠佢絕殺先贏到波咋。

圖片：manchestereveningnews.co.uk

#76　文奴加西亞

年齡：18

國藉：西班牙

位置：右翼

同樣係2014年加盟曼城，今季開始俾柏歷堅尼帶上一隊，喺足總盃出場之前已經有兩次聯賽盃上陣紀錄，聯賽盃對水晶宮大勝5-1嘅比賽就係佢入第五球架啦。而對車仔場足總盃佢傳送成功率有92%，僅次於費蘭度嘅97%，對住full team車仔交到呢個數都好叻仔，睇球王片其實文奴加西亞遠射都有啲料到，相信假以時日都係可以成才。

圖片：manchestereveningnews.co.uk

#59　貝辛施連拿

年齡：19

國藉：科索沃

位置：攻擊中場

喺英超主場輸俾李斯特城嘅比賽，曼城由阿古路嘅入球就係由佢助攻。同其他青訓新星唔同，佢並無任何大型國際賽經驗，同曼城一隊跟操18個月只有一次一隊上陣機會，不過勝在態度良好，近期終於爭取到喺足總盃賽事正選上陣。相信之後都會有更多機會喺一隊出現，施連拿擅於長傳，遠射都唔錯，最正係佢連罰球都有，的確係可造之材。

圖片：Dailymail.co.uk

積臣丹拿雅

年齡：20

國藉：比利時

位置：右閘，中堅

暫時丹拿雅被外借到加拉塔沙雷，上季喺些路迪打到風山水起，打後右閘入到５球都算係咁，更得到2014-15年蘇格蘭PFA年度最佳年青球員。外借兩次都係有歐洲賽打嘅球會，可以吸收到唔同嘅大賽經驗，睇嚟下季曼城都可以收為己用。技術唔錯嘅，身體質素以年青球員嚟講都算出色，適應英超應該唔太難。

圖片：express.co.uk

紐卡素名宿舒利亞就批評曼城上場派咁多年青球員出場係唔尊重對手，而比主力休息更加唔係理由，因為世界級球員好似美斯咁都會希望打多啲比賽而唔係休息。不過你又點樣判斷柏歷堅尼唔認為佢嘅陣容唔係最強？而且青年軍又係唔係代表無實力？但如果有睇波嘅你，相信見到嘅都係曼城進攻速度比一隊更快節奏更爽朗，而且比賽態度比某啲一隊球員更積極，呢啲都係現時曼城最需要嘅原素，球壇好多人都批評金錢足球當道，難得有人放膽相估年青球員，應該俾多啲肯定先真。

李羅渣

八十後、１４年曼聯球迷、３年愛華頓球迷、演員、網台主持，真‧偽文青

鍾意睇戲睇書，又鍾意打泰拳，亦鍾意飲飲食食，特別係紅酒同打邊爐

總之動靜皆宜，又乜都想試，係一隻合成獸。