圖片：Now新聞

舊年港足雖然喺世界盃外圍賽出局，不過兩度守和中國隊嗰種熱血，相信而家諗返起都覺得熱血沸騰，香港足球都唔係臘鴨。但係香港聯賽就一向都搞得麻麻地，所以間唔中都有啲球迷呀、球圈中人呀、足總高層呀甚至立法會議員都會建議香港不如組隊打中國聯賽。足總主席梁孔德之前出席樂視中超轉播權嘅記招時，就話遲啲會同中國足協副主席林曉樺見面，除咗傾香港球員被當成外援嘅問題之外，仲會傾下香港球會打中國足協盃嘅可能性，表面上，香港球會可以打啲高水平比賽，但諗真啲就連有幾大可行性都成問題。

圖片：蘋果日報

前幾日新界東補選，大家都見本民前嘅梁天琦成績幾出色，唔使講都知本土主義同抗拒大陸化嘅訴求已經成為主流聲音。表面上香港球會打中國賽事就好似史雲斯打英超，或者摩納哥打法甲一樣，不過威爾斯同法國又無香港嗰種敏感嘅政治理由，如果足總有意成事，香港人真係再掟磚都似。當然足總可以話香港照樣可以有球會打本地聯賽，不過俾你揀，你想睇水平廣洲恆大對南華，定係傑志對皇室南區呀？你懂的。

圖片：河北華夏幸福

中超今時唔同往日，政治因素之下各大球會都引入當打外國球星，之前都講過啲轉會幾痴線，唔重覆啦。要提升香港足球水平，就要俾香港球員打多啲高水平比賽，香港球會打中國足協盃就做到呢樣嘢，足總就係咁諗。當梁孔德同大陸講掂數，香港球會由邊度開始打？第一階段打業餘球會，有乜意思？第二階段打中乙球會，之後就中甲、中超。打得幾場波，可以點提升港足水平，我都未計出局就再打少啲。同埋人哋大陸已經有羅賓奴、拉美利斯、謝雲奴睇，到底巴倫古素、陳肇麒、林嘉緯對大陸球迷又有咩吸引力？人哋中國足協都唔係善堂，無義務幫你振興香港足球啫。

圖片：蘋果日報

即使當你真係可以去打中國足協盃，其實都無保證過隊波嘅球員全部係香港人，一樣可以買外援，中國足協盃水平肯定比香港高，到時球會為喺中國足協盃打到更好成績，一定係不斷引入外援，咁樣嘅話其實對香港足球有乜好處？同喺香港食花生睇中國足協盃無分別。

香港足球要搞得起，政府、足總、球圈、球迷都要付出，同時要非常多嘅時間。直到而家，我哋都睇唔到到底政府好有誠意搞好足球，鳳凰計劃俾一年2000萬左右，都係杯水車薪，真係要搞好香港足球，第一件事要商業化，有財團肯落力搞波未必一定成功，但最少有個好開始，之後應該向日本學習。另外一樣重要嘅當然係足總改革啦。

最後賣下廣告，小弟開咗個facebook page，希望各位gentlemen都支持下俾個like，最主要原因係見到好多gentlemen喺facebook留comment，用個page嚟同大家傾計比較方便。除咗足球，都會有好多生活趣事同各位分享，順手練下支筆咁啦，請指教！（李羅渣facebook page: https://www.facebook.com/leerogerfcpage/）

-------------------------------------------

李羅渣

八十後、１４年曼聯球迷、３年愛華頓球迷、演員、網台主持，真‧偽文青

鍾意睇戲睇書，又鍾意打泰拳，亦鍾意飲飲食食，特別係紅酒同打邊爐

總之動靜皆宜，又乜都想試，係一隻合成獸。