圖片：Telegraph.co.uk

香港地，每日生活都充滿競爭同壓力，無論家人、上司或者老師都對自己有唔同期望，所以無論你係乜嘢年紀，總有事事不如意甚至想放棄嘅時候。想放棄又唔係錯嘅，最緊要相信「留得青山在，哪怕無柴燒」，只要你想企起身，就有改變命運嘅機會。即使世界球壇，大器晚成嘅例子比比皆是，好似今季李斯特城爭標功臣占美華迪一樣，你又點估到佢幾年前仲打緊英格蘭第八級聯賽？而想放棄嘅你，睇完華迪嘅經歷，會唔會想俾多次機會自己再努力過？

圖片：Dailymail.co.uk

占美華迪本身係錫周三青年軍，不過16歲就俾鍚周三放棄，之後佢就去咗史托克橋鋼鐵繼續佢嘅足球生涯，未聽過呢隊波？唔出奇，因為佢哋係英格蘭聯賽系統入面嘅第八級聯賽，即係連職業聯賽都唔係。17歲嘅華迪，當時週薪只有100鎊。不過史托克橋主席伯利特就話占美華迪個性堅強而有毅力，佢永遠係第一個到訓練場，同時係最遲離開嘅一個。而喺球場上，無論對手攔截有幾粗野，佢都會好快起身繼續比賽，無論對手係邊個都無所畏懼。

圖片：express.co.uk

圖片：leicestermercury

不過，年青嘅占美華迪好勇鬥狠，有唔少年青球員都有嘅紀律問題，甚至因為喺酒吧打交，被警方要求喺身上帶追蹤器，每日都要晚上六點半前返到屋企，每逢作客比賽，佢都只能夠打半場就要換走，確保六點半可以返到屋企，不過門禁並無令到呢位壞孩子放棄佢嘅足球夢，其後轉會到哈利法斯同費利活特，都一樣有驚人表現。特別喺費列活特短短一季上陣42場，更入咗34球！咁突出嘅表現，吸引咗2012年仍然喺英冠嘅李斯特城以100萬鎊收購，100萬鎊對費列活特呢間議會聯賽球會絕對係天文數字。

圖片：Dailymail.co.uk

李斯特城嘅第一季，亦係占美華迪首次喺職業聯賽比賽嘅球季，不過占美華迪初嚟報到並唔順利，第一季只係幫李斯特城入咗4球，仲俾球迷批評佢係水貨。雖然嗰季李斯特城排第6完成賽季，有得打升班附加賽，不過仍然功虧一簣未能升班。不過到第二季華迪終於大發神威，入咗17球，數字僅次於當時隊中主力射手紐根特，同時李斯特城成為英冠聯賽冠軍，直接升上英超。

圖片：theguardian.com

李斯特城上季升上英超，正式開始佢哋嘅奇蹟之旅。占美華迪為人所認識就係2014年9月21日主場反勝曼聯5-3嘅比賽。華迪一人之力以速度同身體對抗性嘅優勢搏到拉菲爾同布歷基犯規得到兩個十二碼，再另外射入一球同交出兩個助攻，最後呢場比賽華迪成為表現最住球員，李斯特城呢季表現不過不失，以第14位完成賽季留喺英超。而華迪更喺同一季更為英格蘭國家隊首次上陣。

圖片：skysports

至於今季雲尼亞里上任，球隊打法極具效率，相信都唔需要多李斯特城發生乜事，而對占美華迪嚟講，就算英超冠軍未到手，對佢嚟講今季已經係極為豐收嘅賽季，上半季就破左雲尼斯特萊連續取得入球紀錄（11場），英超射手榜更同熱刺嘅哈利簡尼一樣取得19球，當然唔少得嘅就係嚟緊歐洲國家盃入選英格蘭嘅機會，更有傳聞佢俾皇家馬德里同巴塞隆那睇中，不過，華迪已經同李斯特城續約到2019年，睇黎29歲嘅佢同李斯特城嘅神奇之旅仲未會完結。

圖片：bostonherald

或者你認為占美華迪做到嘅嘢你未必做到，係架，不過有一樣嘢佢同你都係相同，就係過程中佢都需要好多人幫助同支持，先可以走到今日。占美華迪需要嘅係隊友同領隊嘅支持，李斯特城就需要對佢哋不離不棄嘅球迷，亦即係佢哋嘅第十二人。無論你身處乜嘢環境都好，你都有屬於你嘅第十二人，就係你嘅朋友同家人，只要你想，佢哋都會無條件支持你，不如你都俾個機會佢哋，分享你嘅所有啦。

李羅渣

八十後、１４年曼聯球迷、３年愛華頓球迷、演員、網台主持，真‧偽文青

鍾意睇戲睇書，又鍾意打泰拳，亦鍾意飲飲食食，特別係紅酒同打邊爐

總之動靜皆宜，又乜都想試，係一隻合成獸。

facebook: https://www.facebook.com/leerogerfcpage/