香港隊終於完成咗八場世界盃外圍賽亞洲區第二輪嘅賽事，當然香港喺星期四晚作客輸俾卡塔爾2-0之後正式晉級下一輪無望，不過兩度悶和中國，主場鬥卡塔爾尾段連轟兩球都為唔少香港人帶來難忘回憶。不過我見網上有啲朋友就幾不以為然，因為呢隊香港隊好多都係入藉球員喎，睇完真係嚇一跳，然後得啖笑，其實入藉球員都唔代表一得勁嘅，而且，用血統嚟界定啲球員可唔可以代表自己地方，已經好落後。

香港由開埠到而家都有唔同種族嘅人生活，除左佔大部份嘅華人，當然仲有白人，中東人，印度人，日本人、韓國人等等啦。佢哋有啲可能上好幾代已經喺香港落地生根，仲耐過你同我祖先，而且，佢哋都係香港人口一部份，咁點解唔可以代表香港隊披甲呢？如果覺得只有華人先係真正香港人，咁同強國個「有層次」廣告有乜分別先？最緊要個球員係香港永久居民，又願意為香港付出貢獻，就已經係香港人啦。

就算放眼世界各地，入藉球員都係好平常嘅事，好似法國嘅施丹、拿斯尼、賓施馬都係阿爾及利亞人；德國嘅奧斯爾係土耳其人、謝路美保定係加納人；西班牙我哋最認識嘅迪亞高哥斯達本身都係巴西人；意大利嘅中場泰亞高莫達都係巴西人。要數真係有排數，但你都唔會話呢幾隊國家隊拎世界盃係名不正言不順喎？而家交通咁發達，去其他國家定居生活幾咁閒呀。

有時間，不如鬧下香港政府好過，咁耐以嚟，香港政麼為足球甚至體育發展做過乜嘢？錢又無資源又無，都有威嗰時就嚟抽水，睇八分鐘波就當支持咗香港隊喇。香港隊今次嘅表現，完全係球圈中有心人同埋球迷支持得返嚟，當然作為香港人，有心嘅平時都可以入下場睇波，都係對香港足球嘅一份小小心意，唔好學似某啲人，因為政治理由，先留意下香港波。

李羅渣

八十後、１４年曼聯球迷、３年愛華頓球迷、演員、網台主持，真‧偽文青

鍾意睇戲睇書，又鍾意打泰拳，亦鍾意飲飲食食，特別係紅酒同打邊爐

總之動靜皆宜，又乜都想試，係一隻合成獸。

facebook: https://www.facebook.com/leerogerfcpage/