圖片：Michael Carrick on twitter

曼聯喺足總盃四強憑馬迪爾補時絕殺愛華頓以2-1險勝打入決賽，今次紅魔決賽對手對水晶宮，奪冠機會係幾大嘅，贏到的話就係後費格遜年代曼聯第一個錦標，意義好重大呀。不過呢次晉級後得來不易，事關青訓後衛科素文沙喺呢場波犯咗兩個錯誤差少少就累全家，我見好多球迷都炒蝦拆蟹話佢唔夠班呀咁，唔係喎，早幾場講到佢係新普巴咁勁喎，特別係曼聯球迷，係唔係應該對自家青訓球員多啲包容呀？

圖片：MANUTD

科素文沙同小神鋒拉舒福特一樣都係下半季先開始為一隊上陣，有速度、身體強壯、防守意識好，中後場又可以勝任多個位置，球迷對佢表現都好有期望。不過對愛華頓場波一次開波無幾耐俾盧卡古爆開造成單刀，好彩有朗尼護空門有驚無險；然後下半場禁區俾巴克利搏到十二碼，又有一向撲十二碼比較弱嘅迪基亞大發神威力保不失，最後好快就俾雲高爾用華倫西亞入替嚇到人家一額汗嘅佢。

圖片：Metro.co.uk

打得後防，除咗要有身形，比賽經驗就一定最重要。位置感、幾時落腳、幾時解圍、幾時交波俾隊友，都唔係一時三刻可以喺訓練度勤力操返嚟，更重要係有豐富嘅上陣經驗先可以成就一個世界級後防球員。而且科素文沙都係第一次打足總杯四強呢啲大賽，你諗下溫布萊係英格蘭足球最重要嘅場地，有啲緊張怯場，好合理呀。

圖片：Thesun

球迷就係好矛盾，個個都鄙視金錢足球，但雲高爾信任青年軍球員，派佢哋打咁重要嘅比賽，差少少出事就口誅筆伐。我唔係話青年軍打到屎咁都要盲撐，但如果我地希望見到更多新星成材，有時都要俾多啲包容同支持，佢哋真係感受到架。雖然對愛華頓場波見佢被換出時個人好似靈魂出竅咁，不過睇返曼聯官網嘅訪問，佢好似無被擊倒，希望佢可以繼續努力啦。

李羅渣

八十後、１４年曼聯球迷、３年愛華頓球迷、演員、網台主持，真‧偽文青

鍾意睇戲睇書，又鍾意打泰拳，亦鍾意飲飲食食，特別係紅酒同打邊爐

總之動靜皆宜，又乜都想試，係一隻合成獸。

facebook: https://www.facebook.com/leerogerfcpage/