圖片：usatoday

呢個星期如果話美斯退出國家隊係足球界最爆新聞，睇怕都無乜人反對。本來以為美斯因為再度失落國際賽決賽而退國家隊好無大將之風，不過同啲捧阿根廷嘅朋友再傾，又好似另有原因，而聽完之後又覺得美斯退隊其實都情有可願。

圖片：thesun.co.uk

美斯雖然係土生土長阿根廷人，小朋友時仲係紐維爾舊生嘅青年軍，但大家都知佢好細個就有啲賀爾蒙疾病，當時經理人就安排佢加盟巴塞隆拿，而巴塞仲出埋錢幫佢醫病，自此佢就喺西班牙定居。美洲球迷都幾介意國家隊中有太多海外效力嘅球員，覺得佢哋為錢出國，美斯11歲就喺西班牙定居就更加死多兩錢重。支持佢嘅阿根廷球迷係有，不過因為佢飲西班牙奶水大而唔鍾意佢嘅球迷都幾多，有啲激進啲嘅球迷仲話美斯唔係阿根廷人係加泰人，所以美斯呢件藍白戰衣比其他人特別沉重。

圖片：fourfourtwo

馬勒當拿喺美洲國家盃決賽前都有說話俾阿根廷聽，叫佢哋如果決賽鸁唔到就咪鬼返阿根廷。對我哋嚟講，馬勒當拿只係球壇巨人，但對阿根廷人嚟講，佢係神一般嘅存在，而美斯就被視為新馬勒當拿。最弊係月初時老馬就開口話美斯無領袖風範，佢宿敵C朗拿度呢方面就好過佢咁話，長期活喺馬勒當拿陰影，仲要俾阿根廷嘅神批評，而家又再俾希古恩敗走個國際賽冠軍，唔退隊就有鬼，唔好話馬勒當拿而家叫佢唔好走，跪埋喺美斯面前都無補於事。

圖片：WSJ

雖然美斯一路被批評國家隊表現無喺巴塞時咁好，不過呢兩年都已經好咗好多，阿根廷人腳又咁強連續三次國際賽決賽都輸波係幾令人失望。而家連馬斯查蘭奴、阿古路、迪馬利亞呢班國腳都想一齊退隊，原因係抗議阿根廷足總長期貪腐，但係而家手頭上無太多資料，不如等多啲消息再同大家講。

李羅渣 (facebook page: https://www.facebook.com/leerogerfcpage/)

八十後、忠實曼聯球迷、唔忠實嘅愛華頓球迷、網台節目主持、Menclub足球文章作家、演員

由懶到出汁變成泰拳愛好者

除咗足球最鍾意就係睇戲、睇書、飲兩杯

唔求發大達，最想成為有些少生活品味嘅偽文青。