圖片：Goal.com

今屆美洲國家盃決賽阿根廷輸俾智利後，美斯心灰意冷退出國家隊，唔止球圈中人開口叫美斯變回成命，就連阿根廷總統都要親自打電話俾呢位馬勒當拿接班人希望佢再三考慮，最後阿根廷領隊巴沙親自去西班牙說服美斯復出，退出國家隊短短46日就回歸，除咗因為當日決定係一時意氣，仲有好多實際原因令美斯仍然要打國家隊。

圖片：bola.net

阿根廷國家隊仲有個紀錄等緊美斯，戰神巴迪斯圖達嘅國家隊入球紀錄佢就破咗好耐啦，另一個就係J辛尼迪嘅上陣紀錄，美斯而家先29歲，仲可以打多兩三年嘅，只要打多31場就可以追過J辛，點會唔頂埋佢名流青史？

圖片：skysports

自08年開始金球獎就係由美斯同C朗輪流奪得，金球獎雖然係由國家隊隊長同領隊，仲有全球記者投票選嚟，無乜客觀標準。但投票嘅人一定會考慮國家隊同球會表現投票。如果美斯唔再打國家隊，金球獎可能就俾C朗壟斷，身為世界最強球員二人之一，要阻止C朗壟斷金球獎呢方面，美斯都需要阿根廷國家隊。

圖片：skysports

美斯一直都非常渴望得到國家隊嘅錦標，本來C朗喺葡萄牙一樣得個吉就無乜所謂，但係葡萄牙今屆都驘到歐洲國家盃。阿根廷人腳又好過葡萄牙咁多，要驘國際大賽嘅盃唔係無可能，只要復出就OK，唔想係國家隊表現上輸俾C朗，又要為自己球員生涯有個完美句號，重返國家隊，驘埋兩年後嘅世界盃係必需。

圖片：espnfc

一直以來都個說法，就係美斯不滿阿根廷唔肯棄用決賽敗家仔希古恩，所以當美洲國家盃決賽之後美斯就宣布即時退出國家隊。而美斯宣布退出後，都無落閘話一定唔復出，不過首先要踢走希古恩，而阿根廷公布9月打世界盃外圍賽嘅大軍名單，又真係唔見咗呢位以天價由拿玻里轉會去祖雲達斯嘅射手，令人將美斯復出同呢個決定拉埋一齊嚟講。

李羅渣(facebook page: https://www.facebook.com/leerogerfcpage/)

八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員

由懶到出汁變成泰拳愛好者

除咗足球最鍾意就係睇戲、睇書、飲兩杯

唔求發大達，最想成為有些少生活品味嘅偽文青。