玩具L喜訊日本Bandai推出集運!

文：MenClub 魏文青　　
POSTED ON 25 Aug 2016

各位Gentlemen有福啦！大家都知文青好鍾意同大家介紹喺日本Bandai網有售嘅玩具精品，不過日本Bandai就只係送日本本土，如果喺香港想買，你就要自己搵代運或者集運。不過今日我又上Bandai網睇，就發現原來佢推出咗官方集運，仲有中文教你點用！

根據Bandai官網所指，今次推出嘅係「海外寄送服務」，嚴格上即係大家認知嘅集運。如果你有淘寶開，咁成個過程應該就唔算難明。首先你要選擇要用嘅運輸公司，並且開設戶口，之後你就會有一個集運倉嘅地址。之後就去Bandai個網到落單，運送地址就寫返集計公司比你個集運倉。再去返集運公司個網站登記你買咗啲咩，之後就等Bandai送件貨去集運倉。到貨之後集運網站會出提示畀你，你上返個網畀日本去香港嘅運費，之後可以安坐定中等貨到啦！

官方就推薦咗三個合作伙伴，仲列哂佢哋嘅特點出黎。文青好快手咁就試過「SAMURAI BUYER」同「FROM JAPAN」兩個網站。其中「SAMURAI BUYER」喺登記之後就會提供一個有個人號碼(SA XXXXXX)嘅地址，你就可以用呢個地址去Bandai落單。之後就同上面嘅步驟差唔多。
用呢個地址落單再去填返資料。收費係500Yen加日本至香港運費
而「From Japan」就更加簡單，登記完之後，直接將你係Bandai睇中件貨條Link貼上佢個網，佢就會直接Load出一表格，填返少少產品資料，佢就會幫你報價，價啱再確定埋之後佢會幫你落埋單！之後直接送黎香港！好方便又好邪惡呀！
呢到貼Link 填埋張Form，仲有得Up相確保佢知你想買邊件貨。
雖然市面上仲有好多集運/代購公司，大家講廣東話仲易溝通，不過大家又不妨試下呢個官方合作好唔好用。況且呢個係一個好開始！如果佢遲啲做到淘寶咁有得喺落單時揀埋集運就好啦！