圖片：safc

英超唔經唔覺已經打咗六輪比賽，不過黑貓新特蘭今季由天才莫耶斯帶領仍然開唔到勝利之門，佢哋近六場聯賽以1和5負拎1分包緊底，睇怕下季英冠都可以留個位俾新特蘭。成績咁差，當然又有消息話新特蘭已經考慮緊炒莫耶斯。不過，呢幾季新特蘭都係到季尾先僅僅護到級，然後下季又輪迴。今季英超競爭咁大，新特蘭降班一啲都唔意外。與其又炒領隊，所有嘢推倒重來，不如真係俾兩三年時間天才執執隊波，長遠對新特蘭嚟講先係上策。

圖片：skysport

講得莫耶斯，大家都會講起佢將愛華頓建立成一隊一度衝擊歐聯決賽周嘅前列球隊，轉會永遠抵食夾大件，又識因材施教，所以三年前佢俾曼聯掃地出門後都有唔少球會爭住搵佢教，就係為咗成為第二隊愛華頓。新特蘭2006年升班後已經用咗11個領隊，某程度上都因為轉換領隊太快有關，球隊長期處於重建狀態，打唔出風格，成績好難會好。今季開季咁差，唔可以完全怪罪莫耶斯。

圖片：dailystar

其實莫耶斯嚟到新特蘭，已經無再犯喺曼聯時轉會優柔寡斷嘅錯誤，收購球員都以年青為主，特別係借用曼聯嘅贊奴沙，仲收購咗後防球員麥拿亞同當奴路夫。新特蘭財力雖然以下游嚟講算係唔錯，不過點都唔係皇馬、巴塞、拜仁嗰啲豪門，無可能成隊換走。因此隊中真係有質素，又只有迪科爾同贊奴沙比較似樣。其他球員特別係後防完全不堪入目。到而家為止新特蘭聯賽已經失咗12球，係全英超第三高。

圖片：safc