球季過咗大半，史雲斯大部份時間都處於榜尾地帶，幾乎從未排高過第十八位，好多人都以為呢隊威爾斯球隊下季好有機會要去英冠作賽。但好彩距離季尾仲有啲時間，加上炒咗美國教頭巴特里之後就搵到安察洛堤嘅前副手基文迪執教。呢位四十四歲嘅年輕英格蘭領隊加盟一個星期就有作客3-2殺低利物浦呢場代表作，基文迪仲做埋英超一月最佳領隊。而未計尋晚對候城嘅護級大戰，史雲斯近八仗贏咗五場，拎到十五分，而輸波嘅都係對強隊(阿仙奴、最城、車路士)護級形勢可謂一片大好。

其實基文迪球員生涯只喺非聯賽球會打滾，而且22歲就結束球員生涯，並且喺車路士青年軍開始做教練。到1999年基文迪就考到A級教練牌，喺車仔先後跟過希丁克同安察洛堤兩任領隊，後來就跟「安帥」去過PSG同皇馬。雖然先後去過唔同大球會工作，不過大多只係擔任副手。除咗史雲斯之外，基文迪真正擔正嘅就只有2015年接替被炒嘅麥卡倫出任打比郡領隊，仲係當時英冠最高薪領隊。嗰時成績都唔錯，打到14勝12和7負排第5，升班都係有機會，可惜教咗唔夠一季就被球會革扯。

基文迪嚟到史雲斯之後，球隊無以前咁堅持地面進攻，亦多返唔少長傳，組織上就有更多選擇。始終無人講話打地波先係勁嘅，如果人腳上應付唔到呢種戰術當然唔好勉強。另外基文迪喺一月轉會窗時搵咗唔少好球員加盟，值得一提嘅就係湯卡奴爾同埋馬田奧臣，特別係馬田奧臣原來係帶刀侍衛，加盟兩個月已經入咗兩球，如果史雲斯可以再改善一下防守，相信護級前景會更樂觀。

今季英超護級其實幾緊湊，除咗包尾嘅新特蘭，其餘6隊其實只係差六分。李斯特城炒咗雲尼亞里之後氣勢如虹，已經追到同史雲斯同得27分，仲以得失球壓贏排第十五。再之後嘅水晶宮前景就比較令人擔心，佢哋雖然已經有護級專家艾拿戴斯坐鎮，不過球隊信心盡失，連大Sam都搖頭嘆息。至於包尾嘅新特蘭，經過一輪小陽春，近排又打回原形，近十場只係拎到四分。想當日莫天才仲話新特蘭個班底同費sir時期嘅曼聯好相似喎，我都覺得似呀，因為兩隊都有奧沙喺度嘛！

李羅渣 (facebook page: https://www.facebook.com/leerogerfcpage/)

八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員

由懶到出汁變成泰拳愛好者

除咗足球最鍾意就係睇戲、睇書、飲兩杯

唔求發大達，最想成為有些少生活品味嘅偽文青。