真正落筆之前，我掙扎咗好耐呢篇文，應該放喺「Lifestyle」定係「Gags」。

放喺「Lifestyle」嘅原因好簡單，首先佢嘅製作者是個叫「Paul McCarthy」(順手提一提你，Beatles嗰個係McCartney)的藝術家，而呢件嘢展出的地點係巴黎的「凡登廣場(Place Vendome)」。藝術家喎！巴黎喎！就咁聽落都好有文化氣息啦下話，仲唔係「Lifestyle」？

但令我想將呢篇嘢放喺「Gags」嘅原因，就係呢件藝術品本身。

各位純情小男孩可能唔知呢件嘢有咩特別，所以容許我又教多一個生字：「Butt Plug」，維基百科譯：「肛門塞。」

冇錯，即係話依家係有一碌廿四尺高、青BB嘅性玩具放咗喺法國巴黎一個拿破崙為咗紀念自己打贏仗起嘅廣場入面！

你話「有冇搞錯呀！點會當街當巷擺咁大碌出黎架！啲鬼佬都唔知諗咩嘅！」事實上亦唔係每個法國人都鍾意呢個塞，所以Paul McCarthy一直對外宣稱呢件藝術品，其實係棵「樹」。

但當你知道以下呢個托住碌「假狗」的聖誕老人，同埋喺西九嗰Pat吹氣屎都係出自Paul手筆，你仲會唔會信上面呢碌係「樹」？你信唔知中國大陸係最民主呀？