上次用幅靚女圖引大家入嚟睇，點知發現好多Menclub讀者都係美劇粉，仲要係高汁，唔係有女就得嗰隻！我覺得好汗顏，今篇我I am Deep D以我爺爺之名發誓，用盡我畢生嘅睇劇功力同以我嘅創作人生做賭注，同大家考究下「燒腦」究竟係咩一回事！

成日話美劇燒腦，因為佢唔係淨係用眼球去睇就得，仲要用腦去諗，先明白劇集講乜，你睇得美劇，或多或少你都想入面嘅內容畀到你驚喜，以下我就總括咗幾點，究竟燒腦嘅美劇用緊咩技巧嚟引你將寶貴嘅人生攞晒嚟煲劇？

(！！！劇透注意！！！)

估佢唔到先叫「燒腦」

宇宙間有種劇，劇情係連初生猴子都估到，叫大台劇；至於我哋所講嘅燒腦美劇，點解叫做「燒腦」，係因為你估佢唔到。以下就以神級燒腦劇《Breaking Bad》為例，闡釋美劇點燒你腦：

一般普通編劇寫嘅故事，通常個故事結構係咁：

伏筆(小明死咗)----->

故事開始(偵探接手查案)----->

發現疑點(小明成日偷食，成日打老婆)----->

收筆(小明原來被老婆所殺)

以上成個故事嘅故事線係有非常簡單同明確嘅因果，有人死咗，原因係有人殺佢，好多劇本仲會慌死你唔明，不斷透過劇情或演員表情，等你估到真相。

《Breaking Bad》係講一個患癌嘅中學化學老師，為咗賺錢一步步走上毒梟之路。故事第二季一開頭，無啦啦影住主角屋企個泳池，泳池浮住一隻熊公仔……

咁作為觀眾嘅你就會估，點解？係唔係有細路仔留低？定係有啲咩命案發生？

全部錯晒！

真正嘅因果關係係：

泳池有熊仔，原因未明----->

發生一系列事件，令到主角同製毒拍檔Jesse關係愈來愈緊張----->

Jesse識咗個女友，女友慫恿Jesse要從主角身上得到應得嗰份----->

因為另外一個事件，主角去Jesse屋企攞毒品解決有關問題，喺Jesse屋企見到Jesse同女友吸毒，瞓著咗，由於該毒品藥性強，女友之前多次強調，食完後要打側瞓，唔係有機會窒息，主角唔小心令Jeeses女友打平並窒息，但為令Jesse遠雜毒品及製造麻煩嘅女友，主角旁觀女角窒息死----->

女友老豆係機場降落塔職員，由於其女死後大受打擊，導致飛機失事---->

飛機跌落嘅殘骸飛咗入主角泳池，而主角正正係間接令到呢件事發生嘅人

記得我當年睇最後真相大白時，係真係成個《食神》入面嘅谷德昭咁：「真係估你唔到呀！」由泳池公仔正常係諗唔到發生咁多件事，呢種複雜嘅故事係由多個因果鋪陳而成，唔係由A事件推演到B事件咁簡單，而係因為A所以B，因為B所以C，因為C又有 D，因為D所以E，直至Z為止，層層相扣，仲要係真係有關，唔係吹水……

呢啲就係燒腦，睇嘅時候要了解一個跟一個嘅因果關係，仲要理解角色點解會有如此心理。不過呢個只係燒腦嘅其中一點，將來我仲會再講多幾點！請拭目以待！ Btw，封面圖片女郎Krysten Ritter正係劇中嘅Jesse女友，而家紅咗，做咗漫威套《Jessica Jones》嘅女主角，雖然我一見到佢就諗起佢吸毒個樣，不過都Okay嘅！Bye！