唔知平時你哋岀門口需要幾多時間呢？我就起碼都要用四十五分鐘，單單整頭都用左一半時間有多，撞正返工遲起身咁就濕滯啦，冇時間整理髮型，仲要滾水淥腳咁岀門。所以今日講一個快速Gel頭方法，啱曬懶人。

當然凌亂唔係好似十日無洗頭咁，相反要有一個俐落嘅髮型。清爽嘅髮型就最好不過，唔會俾人一種厚重臃腫嘅感覺。

吹頭方面都要留意，吹頭吹得好可以令髮型維持得更持久。所以吹頭嘅時候可以捉起頭髮，吹髮根位置，熱力可以令頭髮定型變得蓬鬆，髮型亦會變得立體，造型亦可更持久。另外如果你嘅髮質係比較柔軟，點Gel都係好容易扁塌變形嘅話就可以先用鹽水打個底。

當然就緊係需要用到髮泥幫助定型，將適量嘅髮泥用手心推開，再用手指隨意地造型，最後再做少少修正，調教理想嘅髮型。再用定型噴霧定型，輕鬆搞店。

做曬所有步驟都唔洗五分鐘，岀門口快左咁就可以訓多陣先起身，又或者食埋個早餐先，唔洗再趕頭趕命咁返工啦。