荷里活著名演員、導演、作家Jonah Hill近日放售一個位於紐約曼克頓「NoHo (即Houston Street以北)」高尚地段嘅閣樓 (Loft) 豪宅。雖然標價唔使1,100萬美金，即係大概HK$8600萬左右，喺香港人眼中都唔係啲咩罕見數字，但相信大家都唔會買架啦，咁就一齊睇相開心下囉！

呢個單位位於NoHo區一幢戰前建築之內，面積3,280平方尺，其中最大賣點之一係有成12尺高嘅樓底，天花更保留原裝嘅紅磚拱形設計，另外超大木製窗框、煙燻白橡木地板以及黑鋼點綴都係來自原裝設計。內牆設計就由著名嘅Axel Vervoordt負責。同時又安裝咗最新嘅智能家居系統，確保住戶嘅方便。

間隔方面，就有個十分四正、超級開揚而且可以容納幾十人同時活動嘅客飯廳，配上各種藝術品裝飾以及戲院級別嘅投影機及投射幕；八人飯檯隔離就係一個有大理石中台、功能齊備嘅開放式廚房。主人房同樣有四個大窗，窗外就有由著名花園設計師Ken Smith設計嘅空中花園，房內亦有衣帽間，仲有兩個大理石衛生間。另外單位內仲有三個套房。建築物本身亦有24小時門房服務、健身中心、小童遊玩房以及天台。

資料來源：Compass