唔知大家仲記唔記得，Tom Holland喺2017年真人騷節目《Lip Sync Battle》男扮女裝，模仿Rihanna濕身勁跳《Umbrella》呢？佢最近就喺名廚Gordon Ramsay烹飪節目《Scrambled》，一邊整香辣炸雞三文治，一邊大爆當年表演嘅幕後花絮，話原本只係想輕鬆演出，點知愈玩愈大，連對魚網襪都係嫲嫲嘅。

《Lip Sync Battle》係一輯美國真人騷節目，每集會請嚟兩位明星對戰，佢哋要喺台上模仿流行歌曲表演，唔使真唱，只需要對嘴（lip-sync），再配合舞蹈同舞台效果，由觀眾同評判決定邊個贏。除咗Tom Holland同Zendaya，Anne Hathaway、Emily Blunt同Tom Cruise等明星都玩過。

Tom Holland日前就喺Gordon Ramsay烹飪節目《Scrambled》上，分享佢喺2017年同Zendaya對戰嘅幕後故事：「件事真係好有趣，當時我同Zendaya討論表演咩嗰陣，大家都約定輕輕鬆鬆（easy breezy）咁表演就算，唔會玩啲太瘋狂嘅嘢。」然而，呢個「輕輕鬆鬆」卻漸漸演奏成一場多層次嘅驚喜表演：「我同創意團隊討論時，佢哋提起《Umbrella》嘅想法，排練時亦變得愈來愈瘋狂，然後就加入雨機、假髮、快速換衫，仲著埋魚網襪。」當Gordon Ramsay問起對魚網襪係咪問媽媽借嗰陣，Tom Holland就笑住回答：「其實對魚網襪係我嫲嫲嘅。」

最後嘅表演係點大家都見到，Tom Holland首先身穿西裝，假扮係表演經典歌舞片《Singin' in the Rain》，然後突然畫風一轉，換上女裝濕身勁跳Rihanna名曲《Umbrella》，嚇到在場對手兼現時未婚妻Zendaya目定口呆、哭笑不得。

不過，Tom Holland提到當佢爸爸得知表演計劃後，曾勸佢再三諗清楚：「阿仔，我覺得呢個唔係好主意，你最好唔好做啦。」對此，Tom Holland就認為爸爸當時係擔心佢事業發展太快，怕太出名會影響佢童年生活，所以唔希望佢參與咁多非必要嘅電視節目。