如果你係我哋MenClub嘅長期讀者，咁你好可能早已脫離年輕人嘅皆段，向住「中年」進發，甚至即將要面對所謂嘅中年危機。不過據一個最新發佈嘅全球研究顯示，「中年危機」可能已經不再存在，因為依家嘅Z世代年輕人，比起中年人更加唔開心。

首先，所謂嘅中年危機其實係指人嘅生活滿足度會自青年時期隨年齡增長而下降，直到50歲左右去到最低點，進入老年階段後先再次回升（亦可以反過黎講中年人嘅壓力最高）。但跟據美國全國經濟研究所最新發表嘅一份研究報告，現今Z世代嘅「絕望」程度原來比起中年人更高，如果以往絕望與年齡嘅關係一個反轉嘅U型，中年人位於高峰，咁依家就係一條向下嘅斜線，年輕人位於頂端。再換言之，所謂「中年危機消失」唔係因為中年人變得開心，而係因為年輕人變得非常唔開心，相對之下中年人就變「正常」。

研究團隊指出現今Z世代面對嚴重嘅心理健康問題，當中猶以12至25歲嘅年輕人最為嚴重，女性亦比男性嚴重。研究指出年輕人一出社會就面對住各種難題，「他們試圖爬上梯子，但對某些人來說，梯上某些橫桿突然被某人拿走了」。

不同年代中，不同年齡嘅「絕望」程度。紫色虛線為最新研究

圖片：RISING YOUNG WORKER DESPAIR IN THE UNITED STATES

研究同時指出，過往研究均認為有工返嘅人，心理健康會比失業者更好；但今次研究則發現40歲以下嘅人中，有返工嘅心理健康反而更差，而且由越年輕情況就嚴重。

雖然研究嘅主要目的唔係搵出年輕人唔開心嘅原因，但同時亦有提出多個可能嘅理由。當中包括工作變得越黎越不穩定性、勞工自主權減弱、技術快速變遷與工作場所中的數位監控、工資相對於生活成本停滯不前、以及集體談判能力被削弱等。同時對於穩定工作的傳統期望喪失，以及「零工」經濟崛起，也可能讓較年輕的勞工感到特別脆弱及沮喪。

資料來源：Fortune、RISING YOUNG WORKER DESPAIR IN THE UNITED STATES